შსს აჭარის ავტონომიური რესპუბლიკის პოლიციის დეპარტამენტმა სექტემბერში 64 ერთეული დივანი და 4 ერთეული ნაჭრის პუფი შეიძინა. სახელმწიფო შესყიდვების სააგენტოს გვერდზე გამოქვეყნებული ინფორმაციით, ერთი სამადგილიანი დივანი თავისი ორი სავარძლით 3 100 ლარი ღირს. კიდევ სამი კომპლექტის (დივანი და ორი სავარძელი – განსხვავებული მახასიათებლებით) ფასი ჯამში 7 500 ლარია.
გარდა ამისა, დეპარტამენტმა შეიძინა 60 ერთეული სამადგილიანი გასაშლელი დივანი. თითოეულის ფასი 650 ლარია, რაც ჯამურად 39 000 ლარს აღწევს. რაც შეეხება ნაჭრის პუფებს, ერთის ფასი განსაზღვრულია 350 ლარით. ხელშეკრულების თანახმად, დეპარტამენტის ქონება ოთხი ასეთი პუფით შეივსება.
მხარეებს შორის ხელშეკრულება მიმდინარე წლის 4 სექტემბერს გაფორმდა. მიმწოდებელია შპს „ბათუმი 2026“. სახელშეკრულებო ღირებულება 51 000 ლარს შეადგენს, ხოლო მიწოდების ვადაა 40 კალენდარული დღე ხელშეკრუელბის გაფორმებიდან.
