ქობულეთში, კულტურის სახლის რეაბილიტაცია ამ დრომდე არ დასრულებულა. კომპანიამ ხელშეკრულების პირობები და ვადების გახანგრძლივება რამდენჯერმე მოითხოვა, რასაც მერია უპირობოდ თანხმდება. დოკუმენტში სულ მცირე, ცვლილება ცხრაჯერ შევიდა. ბოლო ცვლილების თანახმად, ვადა ერთ თვეში იწურება, თუმცა სამუშაოები ჯერ არ დასრულებულა.
ხელშეკრულების თანახმად, შპს “ნიკამ” შენობის კაპიტალური რეაბილიტაცია უნდა მოახდინოს, რომლის ბიუჯეტი 840 718.92 ლარს შეადგენს. თანხის 96 პროცენტი მერიას კომპანიისთვის უკვე გადახდილი აქვს. სატენდერო დოკუმენტაციით ირკვევა, რომ ქობულეთის მერიამ კომპანიის მიერ შესრულებული სამუშაოების დაწილი დაიწუნა და შპს “ნიკას” ხარვეზების აღმოფხვრა მოსთხოვა.
“სამწუხაროდ კომპანიამ ვადები დაარღვია. სამუშაოები ახლა ჯარიმების ფონზე მიმდინარეობს და დასასრულს უახლოვდება” – ეს კომენტარი ქობულეთის მერის ყოფილს მოადგილეს, დავით ვერულიძეს ეკუთვნის, რომელიც “აჭარა თაიმსს” 29 თებერვალს მისცა.
ერთი წლის თავზე კულტურის სახლი ვიზუალურად თითქმის არ შეცვლილა, ხარვეზები დღესაც თვალსაჩინოა. შენობის ფასადი შელახული, შენობაში კი კედლები დაზიანებულია. გაჭიანურებული სამუშაოების გამო, თანამშრომლებს მუშაობა ერთ ოთახში უწევთ, ხოლო სცენაზე ღონისძიებების გამართვა ფაქტობრივად შეუძლებელია.
იმის გამო, რომ კულტურის სახლის რეაბილიტაცია თავდაპირველად დათმულ ვადებში არ დასრულებულა რიგი ღონისძიებები ვერ იმართება. ორგანიზატორებს, რამდენიმე თვის წინ, ერთ-ერთი, სოლო კონცერტის ჩატარება ღია ცის ქვეშ მოუწიათ.
რა ეტაპზეა სამუშაოები, როდის დასრულდება რეაბილიტაცია, რატომ შევიდა ხელშეკრულებაში ცვლილებები და რატომ თანხმდება კომპანიის მოთხოვნებს უპირობოდ ქობულეთის მერია – კითხვებზე უწყებაში არ გვიპასუხეს.
ინფორმაციისთვის: შპს “ნიკას” სახელმწიფო
tendermonitor.ge-ის ინფორმაციით, კომპანიას დღეის მდგომარეობით 301 ტენდერში აქვს მონაწილეობა მიღებული, მათ შორის 12 გამარტივებული შესყიდვაა, აქედან 27.9 % მოგებული აქვს.
