მას შემდეგ, რაც ბათუმის საკრებულოს თავჯდომარე აჭარის უმაღლესი საბჭოს დელეგატად დასახელდა წარმომადგენლობით ორგანოში ხელმძღვანელის პოზიცია ვაკანტური გახდა. ამ ეტაპზე უცნობია ვინ ჩაანაცვლებს რამაზ ჯინჭარაძეს.
საკრებულოს თავჯდომარის პოზიციის გათავისუფლების შემთხვევაში რას ამბობს ბათუმის მუნიციპალიტეტის საკრებულოს №1 2022 წლის 17 ივნისის დადგენილება:
საკრებულოს თავმჯდომარის მიერ უფლებამოსილების განხორციელების შეუძლებლობის, მისი თანამდებობიდან გადადგომის ან გადაყენების, მისთვის საკრებულოს თავმჯდომარის უფლებამოსილების შეჩერების ან შეწყვეტის შემთხვევაში საკრებულოს თავმჯდომარის მოვალეობას მუნიციპალიტეტის საკრებულოს რეგლამენტით დადგენილი წესით ასრულებს მისი პირველი მოადგილე, ხოლო მის მიერ უფლებამოსილების განხორციელების შეუძლებლობის შემთხვევაში მუნიციპალიტეტის საკრებულოს თავმჯდომარის მოვალეობას ასრულებს უხუცესი მოადგილე.
თუ საკრებულოს თავმჯდომარის არცერთი მოადგილე არ არის არჩეული, ან საკრებულოს თავმჯდომარის მოადგილეთა მიერ უფლებამოსილების განხორციელება შეუძლებელია, საკრებულოს თავმჯდომარის მოვალეობას ასრულებს კომისიების თავმჯდომარეთაგან უხუცესი თავმჯდომარე.
საკრებულოს თავმჯდომარის მოადგილე იმავდროულად არ შეიძლება იყოს საკრებულოს კომისიის ან ფრაქციის თავმჯდომარე. საკრებულოს თავმჯდომარის მოადგილეს უფლებამოსილება ვადამდე უწყდება გადარჩევის, თანამდებობიდან გადადგომის, მისი, როგორც საკრებულოს წევრის უფლებამოსილების შეწყვეტის, აგრეთვე „საჯარო სამსახურში ინტერესთა შეუთავსებლობისა და კორუფციის შესახებ“ საქართველოს კანონით გათვალისწინებული თანამდებობის პირისთვის შეუთავსებელი თანამდებობის დაკავების ან შეუთავსებელი საქმიანობის შემთხვევაში.
“მოდი დაველოდოთ მოვლენებს,” – ასე უპასუხა “აჭარა თაიმსს” ირაკლი თავდგირიძემ, რომელსაც ვკითხეთ თუ როდის შეუდგება მოვალეობის შესრულებას. რა სტატუსით იქნება ბათუმის საკრებულოს თავჯდომარედ ირაკლი თავდგირიძე – ისევ დამოუკიდებელი წევრის სტატუსით გააგრძელებს პოლიტიკურ საქმიანობას თუ “ქართულ ოცნებას” შეუერთდება? თავდგირიძემ კითხვაზე არ გვიპასუხა.
როგორი იქნება უმრავლესობის გადაწყვეტილება – ენდობა თუ არა ირაკლი თავდგირიძეს მისი პოლიტიკური ბეგრაუნდის გათვალისწინებით და ჩააბარებს თუ არა მას საკრებულოს თავმჯდომარის სავარძელს? მალე გაირკვევა. თუმცა საჯარო ცნობების თანახმად, თავდგირიძე ყველა იმ ღონისძიებას ესწრება, რომელიც მმართველი გუნდის მიერაა ორგანიზებული.
ცნობისთვის: ბათუმის საკრებულოს თავჯდომარეს ჰყავს კიდევ ორი მოადგილე: ნატალია ზოიძე და ზურაბ ნაკაიძე.
ინფორმაციისთვის: ირაკლი თავდგირიძე ბათუმის საკრებულოში გიორგი გახარიას პარტიის მანდატით მოხვდა, თუმცა მან მოგვიანებით, “საქართველოსთვის” დატოვა. მაშინ თავდგირიძემ ფეისბუქზე დაწერა, რომ მისთვის მიუღებელია ოპოზიციასთან კოალიციაში შესვლა.
“ჩემთვის ბათუმის საკრებულოს მომავალი წევრისთვის, კატეგორიულად მიუღებელია ნაცმოძრაობასთან (ლელოს ჩათვლით) ნებისმიერი სახით თანამშრომლობა, მითუმეტეს მათთან კოალიცია და თანამდებობის გადანაწილებაზე კონსულტაციაც კი! შესაბამისად, ვტოვებ პარტია საქართველოსთვის ბათუმის ორგანიზაციის ხელმძღვანელის თანამდებობას და საკრებულოში საქმიანობას გავაგრძელებ როგორც დამოუკიდებელი დეპუტატი, ჩემი სინდისის კარნახით და ბათუმელების საკეთილდღეოდ! არა ნაცებს! არა ბოროტებას! ნაცმოძრაობა ვერასოდეს იქნება ბათუმის უმრავლესობა საკრებულოში!” – დაწერა თავდგირიძემ.
“გასაყიდი უნდა გაიყიდოს” – ასე გამოეხმაურა ირაკლი თავდგირიძის გადაწყვეტილებას გახარიას პარტია.
