პოლიციამ ბათუმის ხელოვნების უნივერსიტეტის დეკანი და ოთხი სტუდენტი დააკავა. მათ შსს ჯგუფურ ძალადობას ედავება. მამუკა ჯორბენაძის ადვოკატის ინფორმაციით, დაკავება დეკანის აქტიურობასა და გაფიცვას უკავშირდება. კერძოდ, ის სტუდენტების საპროტესტო აქციებსა და აქტივობებს მხარს უჭერს.
“რატომ და ვის გამო დააკავეს, მამუკა ჯორბენაძე?! ხელოვნების უნივერსიტეტის, მეტყველების ლექტორი თეა ცაგურია სტუდენტებს პარტიულ, ოცნების პროპაგანდა – აგიტაციას უტარებდა და მამუკა ჯორბენაძე ახსენა. მამუკა შეედავა, უნივერსიტეტში აგიტაციის ჩატარების ადგილი არ არისო და მის სახელს რატომ იყენებდა, სტუდენტების წინაშე! შეკამათების დროს, თეა ცაგურია დაემუქრა და ქმარს დაურეკა, რომელიც საჯარო მოხელეა და ბათუმის მერიაში მუშაობს! ქმარი – ირაკლი დევაძემ არ დააყოვნა და მეგობართან ერთად უნივერსიტეტში შეიჭრა! დერეფანში მამუკა ჯორბენაძე კუთხეში მიიწყვდიეს და სასტიკად სცემეს! ჩხუბში სტუდენტები ჩაერთნენ და მათგან სამი, ჯორბენაძესთან ერთად დააკავეს! წარმოგიდგენიათ?! ადამიანს მიუვარდნენ, სცემეს და პოლიციამ, ნაცემი დააკავა! ესეც თქვენი პოლიცია გმირია,” – წერს სოციალურ ქსელში თამუნა თაბუკაშვილი, რომელიც ხელოვნების უნივერსიტეტის კურსდამთვრებულია.
შსს ცნობით, დაკავებულები არიან: 1978 წელს დაბადებული მ.ჯ., 2004 წელს დაბადებული გ.მ., 2003 წელს დაბადებული დ.გ., 2002 წელს დაბადებული გ.დ. და 2004 წელს დაბადებული ა.კ. დანაშაული 2 წლამდე ვადით თავისუფლების აღკვეთას ითვალისწინებს.
“გამოძიებით დადგინდა, რომ მიმდინარე წლის 3 დეკემბერს, ბათუმში გამართული საპროტესტო აქციის ფარგლებში, აქციის მონაწილეთა ჯგუფი ბათუმის ხელოვნების სასწავლო უნივერსიტეტში შევიდა რექტორის სამუშაო ოთახთან ბანერის გაკვრის მიზნით, აღნიშნულის საშუალება არ მისცა ამავე უნივერსიტეტის ლექტორმა, 1981 წელს დაბადებულმა თ.ც.-მ. რის გამოც, ამავე უნივერსიტეტის დეკანმა – 1978 წელს დაბადებულმა მ.ჯ.-მ თ.ც.-ს სიტყვიერი შეურაცხყოფა მიაყენა. გამოძიებით ასევე, დადგინდა, რომ 1978 წელს დაბადებული მ.ჯ. და მისი სტუდენტები მოგვიანებით თ.ც.-ს მეუღლეს – 1975 წელს დაბადებულ ი.დ.-ს და მის მეგობარს – 1977 წელს დაბადებულ ი.ნ. -ს უნივერსიტეტის შენობაში ფიზიკურად გაუსწორდნენ. პოლიციამ ბრალდებულები მოსამართლის განჩინების საფუძველზე დააკავა. გამოძიება სისხლის სამართლის კოდექსის 126-ე მუხლის პირველი პრიმა ნაწილით მიმდინარეობს,” – წერია შსს მიერ გავრცელებულ ინფორმაციაში.
