სოლიდარობა დაკავებულ დეკანსა და სტუდენტებს – ხელოვნების უნივერსიტეტში აქცია გაიმართა

ბათუმის ხელოვნების უნივერსიტეტში სტუდენტებისა და ლექტორების სოლიდარობის აქცია გაიმართა. ისინი მხარდაჭერას ჯგუფური ძალადობის ბრალდებით დაკავებულ დეკანსა და სტუდენტებს უცხადებენ. მათი შეფასებით, მომხდარი პოლიტიკურ მოტივებს უკავშირდება.

„სოლიდარობას ვუცხადებთ დაკავებულ დეკანს და ოთხ სტუდენტს. სასწავლებელში დაპირისპირების დროს ადგილზე ვიმყოფებოდი, წინა დღეს პლაკატები გავაკარით, რაც მეორე დღეს ჩამოხეული დაგხვდა. ლექტორმა თეა ცაგურიამ ხმამაღალი ტონით მოგვმართა, გვითხრა, რომ სხვა სტუდენტებს ხელს ვუშლიდი და ვაბულინგებდით, ქალბატონი თეა ხმამაღალი ტონით და დაცინვით გვესაუბრებოდა. სასწავლებელში დაძაბული სიტუაცია დაიწყო, მამუკა ჯორბენაძე დაცვის მიზნით მოვიდა და თეა ცაგურიას მოუწოდა, სტუდენტების მიმართ წესიერი ტონით ესაუბრა, რის შემდგომაც თეა ცაგურია აგრესიულო გახდა და შეურაცხყოფის მიყენება დაიწყო, მან თავის მეუღლეს შეატყობინა, რომელიც ბათუმის მერიის თანამშრომელია. მამუკა ჯორბენაძეს მუქარის “მესიჯი” მოუვიდა, ამის შემდეგ უნივერსიტეტში ორი პირი მოვიდა, ბატონი მამუკა მარტო ეგონათ და სტუდენტებიც დახვდნენ, მათ სიტყვიერი და ფიზიკური შეურაცხყოფა მიაყენეს. სტუდენტები დეკანის დასახმარებლად მივიდნენ, ისინი გვემუქრებოდნენ და რატომღაც სტუდენტები და დეკანი დააკავეს. ეს ადამიანები დაკავებულები არიან იმის გამო, რომ აქციაზე დადიოდნენ. მამუკა ჯორბენაძე ყოველთვის ჩვენს მხარეს იჭერდა და ახლა ის დაკავებულია. თავად თეა ცაგურია ინციდენტის შემდეგ სასწავლებელში არ გამოცხადებულა. ცაგურია გვეუბნებოდა, რომ სხვა სტუდენტებს ვაბულინგებდით თურმე და სასწავლო პროცესს ვაჩერებდით”,- აცხადებს სტუდენტი მარიამ გუჯაბიძე.

ცნობისთვის: საქმე ამავე უნივერსიტეტის დეკანის, მამუკა ჯორბენაძისა და ოთხი სტუდენტის დაკავებას ეხება. ინციდენტი სასწავლებლის შენობაში გუშინ მოხდა. დაწესებულებაში ერთ-ერთი ლექტორის, თეა ცაგურიას ქმარი შეიჭრა და დეკანს ჯერ სიტყვიერად დაუპირისპირდა, რაც მოგვიანებით ფიზიკურ ძალადობაში გადაიზარდა.

ფაქტი უნივერსიტეტის სათვალთვალო კამერებმა ასახა, კადრები უკანონოდ თეა ცაგურიას ქმარმა, ირაკლი დევაძემ მოიპოვა და სოციალურ ქსელში ატვირთა. კადრები კონტექსტისა და ხმის გარეშე პროპაგანდისტულმა მედიებმა გაავრცელეს.

დეკანისა და ოთხი სტუდენტის სასამართლო პროცესი ჯერ არ გამართულა. მათი ინტერესების დამცველის თქმით, დაკავება მამუკა ჯორბენაძის აქტიურობასა და გაფიცვას უკავშირდება. კერძოდ, ის სტუდენტების საპროტესტო აქციებსა და აქტივობებს მხარს უჭერს.

“კეთილსინდისიერი, განათლებული და მოწესრიგებული ადამიანები არ უნდა იყვნენ იქ, სადაც ახლა არიან. მამუკა ჯორბენაძე არის უპატიოსნესი ადამიანი, არაჩვეულებრივი, ნამდვილად არ ვაჭარბებ. ეს სტუდენტები კი გამორჩეულად კარგად აღზრდილები არიან და თავის მომავალს იცავენ, ამისთვის თუ უნდა დაისაჯონ აღარ ყოფილა ამ ქვეყნად არაფერი. იმედი მაქვს, რომ სასამართლოზე მიიღებენ სწორ გადაწყვეტილებას და ამ ბავშვებს არ დაუღუპავენ მომავალს,” – განაცხადა ჩვენთან საუბრისას ქეთევან ვაჩეიშვილმა, რომელიც ბათუმის ხელოვნების სახელმწიფო სასწავლო უნივერსიტეტის ხარისხის განყოფილების უფროსია.

“აჭარა თაიმსი” კომენტარისთვის ლექტორ, თეა ცაგურიას დაუკავშირდა, რომელიც ინციდენტის ფიგურანტი და როგორც უნივერსიტეტში ამბობენ მაპროვოცირებელია, თუმცა მან ჩვენს სატელეფონო ზარსა და შეტყობინებას არ უპასუხა.

“მეგობრებო, იძულებული ვარ გამოვაქვეყნო კადრები და გამოვეხმაურო იმ სიბინძურეს, რაც ჩაიდინა ბათუმის ხელოვნების უნივერსტეტის დეკანმა მამუკა ჯორბენაძემ, გამოიყენა სტუდენტების გულუბრყვილობა და ჩართო ისინი ჯგუფურ ძალადობაში! ამბავი იყო მარტივად, ამ ინციდენტამდე, დღისით, დაახლოებით სამ საათზე, უნივერსიტეტში, პოლიტიკურ ნიადაგზე სიტყვიერი, ფსიქოლოგიური და მორალური შეურაცხყოფა მიაყენა ჩემს მეუღლეს, რისთვისაც მე მას საღამოს მივწერე და მივუთითე, რომ უნდა სცოდნოდა, როგორ არ უნდა იძალადოს ქალებზე. რის შემდეგაც მან დამიბარა უნივესიტეტში. მეგობართან ერთად მივედი აკადემიურ სივრცეში!! დეკანთან!!! პროფესორთან!!! (ზოლებიანი ზედაში@) სასაუბროდ!!! მაგრამ შესვლისთანავე, გამარჯობის თქმის საშუალებაც არ მომცა!!! დანარჩენს კადრებში დაინახავთ!!! თუმცა, მისმა მხარდამჭერებმა გაავრცელეს ინფორმაცია, რომ მე შევუვარდი უნივერსიტეტში, კუთხეში მივიმწყვდიე ის და სასტიკად გავუსწორდი!!! კადრებში ყველაფერი კარგად ჩანს!!! მშობლებო: მესაჭეობას ნუ მიანდობ ბრიყვს და უმეცარს,” – დაწერა სოციალურ ქსელში ირაკლი დევაძემ, თეა ცაგურიას მეუღლემ, რომელიც ბათუმის მერიის თანამშრომელია.

ინფორმაციისთვის: დაკავებულები არიან: 1978 წელს დაბადებული მ.ჯ., 2004 წელს დაბადებული გ.მ., 2003 წელს დაბადებული დ.გ., 2002 წელს დაბადებული გ.დ. და 2004 წელს დაბადებული ა.კ. დანაშაული 2 წლამდე ვადით თავისუფლების აღკვეთას ითვალისწინებს.