ფინეთის ხელისუფლებამ ბალტიის ზღვაში Eagle S-ის სახელწოდების ტანკერი დააკავა, რომელიც რუსულ ნავთობს გადაჰქონდა.
ტანკერი ეჭვმიტანილია ფინეთსა და ესტონეთს შორის მდებარე წყალქვეშა ელექტროგადამცემი ხაზის, Estlink 2-ის, და რამდენიმე სატელეკომუნიკაციო კაბელის დაზიანებაში.
გემის ეკიპაჟი 20 ადამიანისგან შედგება, რომელთა შორის არიან საქართველოსა და ინდოეთის მოქალაქეები. ტანკერის კაპიტანი, დავით ვადაჭკორია, ასევე საქართველოს მოქალაქეა. მან ფინურ მედიასთან განაცხადა, რომ ინციდენტი “ჩვეულებრივი საზღვაო შემთხვევა” იყო და გამოძიებასთან სრულ თანამშრომლობას აწარმოებს.
ფინეთის ეროვნული გამოძიების ბიუროს ინფორმაციით, ტანკერს ღუზები არ გააჩნდა, თუმცა ეჭვი აქვთ, რომ სწორედ გემის ღუზამ შეიძლება გამოიწვია წყალქვეშა კაბელების დაზიანება.
სასამართლომ ტანკერის გათავისუფლების მოთხოვნა არ დაამაყოფილა, რაც ნიშნავს, რომ გემი ფინეთის საზღვაო ძალების ხელში დარჩება.
უცხოური მედიასაშუალებების ცნობით, გამოძიება ასევე აკვირდება წყლებში გემების გადაადგილების მონაცემებს.
ცნობილია, რომ Eagle S Estlink 2-ის დაზიანების დროს იმ ადგილას იმყოფებოდა, სადაც ელექტროსადენი ზღვის ფსკერზეა.
ტანკერი ეკუთვნის არაბთა გაერთიანებულ საამიროებში რეგისტრირებულ კომპანიას Caravella, რომლის ფლოტშიც მხოლოდ ეს ერთი გემია.
ფინეთის ხელისუფლება გამოძიებას აქტიურად განაგრძობს და ცდილობს, ზუსტად დაადგინოს, თუ ვისი პასუხისმგებლობაა ინფრასტრუქტურის დაზიანება, რომელმაც ქვეყნების კომუნიკაციებს მნიშვნელოვანი პრობლემები შეუქმნა.
