ფოტო: ედო მჟავანაძე
31 იანვარს, ბათუმში, ზებრაზე გადაადგილების გამო, 20-მდე მოქალაქეს სასამართლოში იბარებენ. მათ წინააღმდეგ ადმინისტრაციული კოდექსის 174-ე მუხლის მეოთხე ნაწილის დარღვევას ედავებიან.
მუხლი, რომლითაც ამ ადამიანების მიმართ ადმინსიტრაციული სამართალწარმოება დაიწყო გულისხმობს: „სასამართლოს შესასვლელის ბლოკირება, შეკრების ან მანიფესტაციის მოსამართლის საცხოვრებელ ადგილას ან საქართველოს საერთო სასამართლოში ჩატარება – გამოიწვევს დაჯარიმებას 5 000 ლარის ოდენობით ან ადმინისტრაციულ პატიმრობას 60 დღემდე ვადით“.
ინფორმაციისთვის: აქცია საკონსტიტუციო სასამართლოსთან საღამოს 7 საათზე დაიწყო, როცა სასამართლო აღარ ფუნქციონირებდა. აბაშიძისა და გამსახურდიას ქუჩების გზაჯვარედინზე, სადაც ადამიანები ზებრაზე გადაადგილდებოდნენ, სიმშვიდე იყო. საღამოს საათებში აქ მოძრაობა არ იყო დატვირთული. მახლობლად მხოლოდ ადმინისტრაციული შენობები მდებარეობს. საკონსტიტუციო სასამართლო და აჭარის მთავრობა დღის საათებში ასრულებდნენ თავიანთ სამუშაოს, რაც იმას ნიშნავს, რომ აქციის მონაწილეების გადაადგილება არცერთ მათგანს არ შეუშლიდა ხელს.
ცნობისთვის: აღნიშნულ ადმინისტრაციულ საქმეებს მარიანა ფომაევა განიხილავს. ის ბათუმის საქალაქო სასამართლოს ადმინისტრაციულ საქმეთა კოლეგიის მოსამართლე 2024 წლის დეკემბრიდან არის. მისი ბიოგრაფიის თანახმად, 2018-2023 წლებში იყო იუსტიციის უმაღლესი საბჭოს წევრის რეფერენტი, 2013-2014 წლებში იყო საადვოკატო ბიუროს სტაჟიორი, 2023-2024 წლებში იყო იუსტიციის უმაღლესი სკოლის მსმენელი, მას ასევე, გავლილი აქვს ტრენინგები სხვადასხვა თემაზე.
მარიანა ფომაევამ 2014 წელს დაამთავრა ივ. ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის ბაკალავრიატი, ხოლო 2016 წელს ივ. ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის მაგისტრატურა.
გარემოება: საპროტესტო აქციებზე ადმინისტრაციული და სისხლის სამართლის წესით პასუხისგებაში მიცემული პირების სასამართლო დავები პრაქტიკის თანახმად, გამამტყუნებელი ვერდიქტით სრულდება. მოსამართლე მეტწილად ფაქტების გარეშე ბრალდების მხარის პოზიციას იზიარებს და მოქალაქეებს აჯარიმებს ან ციხეში უშვებს.
