ფინანსთა სამინისტროს შემოსავლების სამსახურის ინფორმაციით, საბაჟო გამშვებ პუნქტში „სარფი“ მებაჟე ოფიცრებმა არადეკლარირებული ოქროს საიუველირო ნაკეთობების ქვეყნის ტერიტორიაზე უკანონოდ შემოტანის ოთხი შემთხვევა აღკვეთეს.
მათ შორის, ერთ-ერთი შემთხვევის დროს, უცხო ქვეყნის მოქალაქის პირადი და მისი მართვის ქვეშ არსებული ავტომობილის დათვალიერების შედეგად, 473 გრამი არადეკლარირებული ოქროს ნაკეთობა აღმოაჩინეს. ოქროს ნივთები პიროვნებას ტანსაცმლის ქვეშ, სპეციალურად მოწყობილ სამალავში ჰქონდა დამალული.
გარდა ამისა, საბაჟო კონტროლის ფარგლებში, კიდევ სამი შემთხვევა გამოვლინდა, როდესაც საქართველოს მოქალაქეები საერთო ჯამში 170,08 გრამი არადეკლარირებული ოქროს შემოტანას ცდილობდნენ. სპეციალურად მოწყობილი სამალავები, მათ შორის ფეხსაცმლის ლანჩის ქვეშ განთავსებული სივრცე, ოქროს ნაკეთობების გადმოტანის საშუალებად იყო გამოყენებული.
შემოსავლების სამსახურის ცნობით, არადეკლარირებული საქონლის საერთო საბაჟო ღირებულებამ 95 425,93 ლარი შეადგინა.
უკანონოდ ოქროს შემოტანის მცდელობასთან დაკავშირებით, ერთ-ერთი სამართალდამრღვევი საქართველოს მოქალაქის საქმის მასალები შემდგომი რეაგირების მიზნით ფინანსთა სამინისტროს საგამოძიებო სამსახურს გადაეცა, ხოლო საქართველოს ორ მოქალაქეს, საბაჟო კოდექსის 168-ე მუხლის I ნაწილის შესაბამისად, ფულადი ჯარიმა – 20 130,16 ლარის ოდენობით შეეფარდა.
