2026 წლის მესამე კვარტალში საქართველოში საერთაშორისო ვიზიტორების მიერ განხორციელებული ვიზიტების რაოდენობა გაიზარდა, თუმცა ტურისტების დანახარჯები შემცირდა. ამის შესახებ ინფორმაციას სტატისტიკის ეროვნული სამსახური ავრცელებს.
საქსტატის მონაცემებით, საანგარიშო პერიოდში საქართველოში საერთაშორისო არარეზიდენტი მოგზაურების 3.1 მილიონი შემოსვლა დაფიქსირდა, რაც წინა წლის ანალოგიურ პერიოდთან შედარებით 3.6%-ით მეტია.
ამავე პერიოდში საერთაშორისო ვიზიტორების რაოდენობამ 2.2 მილიონს მიაღწია, რაც წლიურ ჭრილში 3.1%-იანი ზრდაა. მათ მიერ განხორციელდა 2.6 მილიონი ვიზიტი, მათ შორის 2.1 მილიონი ტურისტული ტიპის ვიზიტი, რაც წინა წლის მესამე კვარტალთან შედარებით 4.7%-ით მეტია.
ვიზიტორების ყველაზე დიდი რაოდენობა რუსეთის ფედერაციიდან იყო – 596.8 ათასი (26.7%). მეორე ადგილზე თურქეთი 14.5%-იანი წილით, მესამეზე კი სომხეთი 11%-იანი წილით გავიდა.
ვიზიტების ყველაზე დიდი ნაწილი თბილისსა და აჭარაზე მოდიოდა. დედაქალაქში 1.3 მილიონი, ხოლო აჭარაში 1.2 მილიონი ვიზიტი დაფიქსირდა.
ვიზიტების 58.8% დასვენების, გართობისა და რეკრეაციის მიზნით განხორციელდა, 21.6% კი მეგობრებისა და ნათესავების მონახულებას უკავშირდებოდა.
მიუხედავად ვიზიტების ზრდისა, შემცირებულია უცხოელი ვიზიტორების მიერ გაწეული ხარჯები. 2026 წლის მესამე კვარტალში მათმა მთლიანმა დანახარჯებმა 5.7 მილიარდი ლარი შეადგინა, რაც წინა წლის ანალოგიურ პერიოდთან შედარებით 8.2%-ით ნაკლებია. ამასთან, ერთი ვიზიტის საშუალო ხარჯი 11.1%-ით შემცირდა და 2 194.4 ლარი შეადგინა.
ვიზიტორების ყველაზე დიდი დანახარჯი განთავსებაზე მოდიოდა – 2 მილიარდ ლარზე მეტი, საკვებსა და სასმელზე კი 1.7 მილიარდი ლარი დაიხარჯა.
