ინფორმაცია განახლდა: თბილისის საქალაქო სასამართლომ თემურ ქათამაძე ადმინისტრაციულ საქმეზე სამართალდამრღვევად ცნო და 2,800 ლარით დააჯარიმა. ქათამაძეს კლინიკა “ვივამედის” გენერალური დირექტორი, ნინო ნადირაძე, სიტყვიერი შეურაცხყოფის მიყენებაში სდებდა ბრალს.
ბრალდების მხარის ერთ-ერთმა მოწმემ განაცხადა, რომ ქათამაძემ ნინო ნადირაძეს სიტყვიერი შეურაცხყოფა მიაყენა, თანაც გინებაც გაისმა და მის მიმართ ფეხიც მოიქნია. თემურ ქათამაძემ ბრალდება უარყოფს და აცხადებს, რომ ნინო ნადირაძისთვის არც სიტყვიერი და არც ფიზიკური შეურაცხყოფა მიუყენებია.
კლინიკა „ვივამედის“ გენერალურმა დირექტორმა, ნინო ნადირაძემ, ბათუმის საპროტესტო აქციების მედროშეს, თემურ ქათამაძეს სასამართლოში უჩივლა. მიზეზი კი, როგორც ნადირაძე ამტკიცებს, სიტყვიერი და ფიზიკური შეურაცხყოფა გახდა.
ნადირაძის განცხადებით, ქათამაძემ მას პალატაში სიტყვიერი შეურაცხყოფა მიაყენა და რაც მთავარია, „ფეხიც კი დაარტყა“. „არამარტო სიტყვიერი შეურაცხყოფა, არამედ წიხლიც ჩამარტყა. მეტს არაფერს გეტყვით, დღეს ჩემი დაბადების დღეა, ნახვამდის. დანარჩენს სასამართლო იტყვის“, – განაცხადა ნადირაძემ „ტვ პირველთან“ ინტერვიუში.
ცნობისთვის: ადმინისტრაციულ სამართალდარღვევათა კოდექსის 166-ე მუხლით შედგენილ სამართალდარღვევის ოქმში მითითებულია, რომ თემურ ქათამაძემ საზოგადოებრივი წესრიგი და მოქალაქეთა სიმშვიდე დაარღვია.
ინფორმაციისთვის: თემურ ქათამაძე 48 დღიანი შიმშილობის შემდეგ „ვივამედში“ გადაიყვანეს, რადგან შიმშილობის გამო მან გონება დაკარგა.
“იმ დღეს ინციდენტს თავიდან ბოლომდე ესწრებოდნენ სახალხო დამცველის აპარატის წარმომადგენელი და მიგრაციის დეპარტამენტის 3 პოლიციელი, გამოიძახეს პოლიცია. სინამდვილეში ეს არის ვივა მედის ადმინისტრაციის მიერ, მიზანმიმართულად დაგეგმილი და კლინიკის ხელმძღვანელობის მხრიდან პროვოცირებული ინციდენტი. ეს არის მათ მიერ დაგეგმილი ტყუილი და ასაჩივრებენ ცრუ ბრალდებით. მე პოლიციელებს მოვუყევი, რა როგორ მოხდა. მიგრაციის დეპარტამენტის თანამშრომლებიც მიერ ბათუმელი მედროშის მიმართ, ვივა მედის ადმინისტრაციის მიერ განხორციელებული 48-საათიანი სპეცოპერაცია სამწუხაროდ, წარმატებით განხორციელდა და დასრულდა. სპეცოპერაციის მიზეზი და მიზანი, ქათამაძის განეიტრალებას ემსახურება“, – ამონარიდი თემურ ქათამაძის წერილიდან.
გარემოება: 11 იანვარს, თემურ ქათამაძე დააკავეს და ის დაადანაშაულეს პოლიციელის მოთხოვნისადმი დაუმორჩილებლობაში. დაკავების შემდეგ მან განაცხადა, რომ პოლიციელებმა ფიზიკური შეურაცხყოფა მიაყენეს. გარდა ამისა, აღნიშნავდა, რომ პოლიციის შენობაში მას უთხრეს: „არ ხარ საქართველოს მოქალაქე, შენს ქვეყანაში წადიო“. თემურ ქათამაძე მუჰაჯირების შთამომავალია და უკვე რამდენიმე წელია საქართველოს მოქალაქეობის მიღებას უშედეგოდ ცდილობს.
გაიცანით თემურ ქათამაძე – ადამიანი, რომელმაც პროტესტი თავისი ცხოვრების ნაწილად აქცია და ბრძოლობს თავისუფლების, დემოკრატიისა და ევროპული მომავლისთვის.
