დღეს, ბათუმში, აჭარის უმაღლეს საბჭოში გამართული პლენარული სხდომა ისტორიაში პირველად დახურულ ფორმატში გაიმართა. გადაწყვეტილება, მედიის არდაშვების თაობაზე, საბჭოს მოქმედმა თავმჯდომარემ დავით გაბაიძემ მიიღო.
სხდომის დასრულების შემდეგ გავრცელებული ოფიციალური ინფორმაციით, თვითგამოცხადებულმა დეპუტატებმა აჭარის მთავრობის თავმჯდომარედ არალეგიტიმურად აირჩიეს ყოფილი პოლიციელი, სანქცირებული სულხან თამაზაშვილი. მის კანდიდატურას მხარი „ქართული ოცნების“ ყველა დეპუტატმა ერთხმად დაუჭირა.
სხდომის პარალელურად უმაღლესი საბჭოს შენობის გარე პერიმეტრზე გაიმართა საპროტესტო აქცია. მედიის წარმომადგენლებმა და აქციის მონაწილეებმა ხელისუფლების წარმომადგენლებს კიდევ ერთხელ შეახსენეს ჟურნალისტ მზია ამაღლობელის უკანონო პატიმრობის ფაქტი და მისი დაუყოვნებლივ გათავისუფლება მოითხოვეს.
თვითგამოცხადებულმა, არალეგიტიმურმა დეპუტატებმა სხდომაზე ასევე დაამტკიცეს აჭარის მინისტრთა კაბინეტი, რომელიც იგივე შემადგენლობის იქნება.
ინფორმაციისთვის: სულხან თამაზაშვილი 2024 წლის ბოლოს დიდმა ბრიტანეთმა შეიყვანა სანქცირებულ პირთა სიაში. საერთაშორისო პარტნიორები მას პასუხისმგებლობას აკისრებენ ჟურნალისტებსა და მშვიდობიან დემონსტრანტებზე ძალადობრივ თავდასხმებზე. სანქციები გულისხმობს აქტივების დაყადაღებასა და სამოგზაურო შეზღუდვებს.
