ბათუმში ჩატარებული საგამოძიებო მოქმედებების შედეგად, განსაკუთრებით დიდი ოდენობით ნარკოტიკული საშუალებების უკანონო შეძენა-შენახვისა და გასაღების მცდელობის ბრალდებით სამი პირი დააკავეს.
დაკავებულთა შორის არიან 2005 წელს დაბადებული საქართველოს მოქალაქე დ.კ., რუსეთის მოქალაქე 1992 წელს დაბადებული ი.ა. და უკრაინის მოქალაქე, 2006 წელს დაბადებული ი.პ.
საქართველოს შინაგან საქმეთა სამინისტროს ცნობით, სამართალდამცველებმა ბრალდებულების პირადი და საცხოვრებელი სახლების ჩხრეკისას, ასევე სხვადასხვა ლოკაციიდან ნივთმტკიცებად ამოიღეს განსაკუთრებით დიდი ოდენობით ნარკოტიკული საშუალებები: „მეთადონი“, „ალფა პვპ“ და „გამომშრალი მარიხუანა“.
მათივე ინფორმაციით, ამოღებულ ნივთმტკიცებებს შორის აღმოჩნდა ნარკოტიკული ნივთიერება, რომელიც ერთ-ერთმა ბრალდებულმა, ი.პ.-მ, ბათუმში სხვადასხვა ადგილას სარეალიზაციოდ განათავსა კანფეტის ქაღალდში დაფასოებული სახით.
გარდა ამისა, პოლიციამ ნივთმტკიცებად ამოიღო ელექტრო სასწორები, პოლიეთილენის პაკეტები და წებოვანი ლენტები, რაც, უწყების მტკიცებით, ნარკოტიკული საშუალებების დაფასოებისა და გასაღებისთვის გამოიყენებოდა.
გამოძიება სისხლის სამართლის კოდექსის 260-ე, 19-260-ე და 273-ე პრიმა მუხლებით მიმდინარეობს, რაც განსაკუთრებით დიდი ოდენობით ნარკოტიკული საშუალებების უკანონო შეძენა-შენახვასა და გასაღებას გულისხმობს. დანაშაული 20 წლამდე ან უვადო თავისუფლების აღკვეთას ითვალისწინებს.
