მდინარე ყოროლისწყალზე ჯებირის მოწყობის სამუშაოები ორ თვეზე მეტია შეჩერებულია. ვითარება თამარის დასახლებაში მცხოვრებთა პროტესტის მიზეზი გახდა. ადგილობრივები შიშობენ, რომ ზამთარში მდინარის დონის მატებამ შესაძლოა მათი სახლები დატბოროს.
მოსახლეობის ინფორმაციით, მაისში მდინარეზე არსებული ჯებირი დაანგრიეს და ახლის მშენებლობა დაიწყეს, თუმცა სამუშაოები მალევე შეჩერდა. ადგილობრივების თქმით, თავდაპირველად სამუშაოები ნელი ტემპით მიმდინარეობდა და დიდი მოცულობის პროექტს მხოლოდ რამდენიმე ადამიანი ასრულებდა. მოგვიანებით კი, მათი ინფორმაციით, პროცესი დასაქმებულებისთვის ხელფასის გადაუხდელობის გამო შეჩერდა.
თამარის დასახლებაში მცხოვრებლები ამბობენ, რომ მდინარის ადიდების შედეგად მათი სახლები წარსულშიც არაერთხელ დატბორილა. რამდენიმე წლის წინ კი, მათი თქმით, ადიდებულ მდინარეს ადამიანები სიკვდილს ძლივს გადაურჩნენ. ისინი შიშობენ, რომ თუ ჯებირის მოწყობის სამუშაოები დროულად არ განახლდება, ზამთარში, ნალექების მატებისა და მდინარის დონის აწევის შემთხვევაში, საფრთხე კვლავ შეექმნებათ.
მოსახლეობის ინფორმაციით, პრობლემის მოგვარების მოთხოვნით მათ ბათუმის მერიას არაერთხელ მიმართეს, თუმცა უშედეგოდ.
„აღნიშნულ საკითხთან დაკავშირებით, ექსპერტიზის ბიუროს მოთხოვნით, კომპანია, რომელიც სამუშაოებს აწარმოებს, ამჟამად ატარებს ლაბორატორიულ და ყინვამედეგობის კვლევებს. მათი შედეგები უნდა წარედგინოს ექსპერტიზის ეროვნულ ბიუროს, რის შემდეგაც შესაძლებელი გახდება სამუშაოების განახლება“, – მოგვწერეს ბათუმის მერიიდან.
