პოლიტიკოსი გიგი უგულავა ოპოზიციურ პარტიებს საჯარო წერილით მიმართავს და ერთიან სტრატეგიულ პოზიციაზე შეთანხმებისკენ მოუწოდებს. მისი თქმით, „ქართული ოცნება“ ადგილობრივ არჩევნებს მხოლოდ სატყუარად იყენებს, ხოლო მონაწილეობა, არსებული პოლიტიკური რეალობის პირობებში, ოპოზიციის დისკრედიტაციისა და რეჟიმის ლეგიტიმაციის საფრთხეს ქმნის.
უგულავას შეფასებით, მმართველი გუნდის მიერ პარტიების აკრძალვის ინიციატივისა და შემდეგ მისი გადადების გამოცხადებამ ნათლად აჩვენა, რომ ადგილობრივი არჩევნები ოპოზიციისთვის პოლიტიკურ ხაფანგად იქცა.
„საქართველოში დღეის მდგომარეობით არჩევნები გაუქმებულია, ხვალ მდგომარეობა კიდევ უფრო მძიმე იქნება, ვიდრე დღეს და ვიდრე 2024-ში იყო“, — აცხადებს ის.
უგულავა მიიჩნევს, რომ ოპოზიციამ უნდა ჩამოაყალიბოს მკაფიო და დეტალური „საგზაო რუკა“, რომელიც განმარტავს:
- რატომ არ მონაწილეობს ოპოზიცია არჩევნებში;
- რა პირობებში გახდება შესაძლებელი არჩევნებში მონაწილეობა.
უგულავა ასევე, რამდენიმე წინადადებასაც სთავაზობს ოპოზიციურ სპექტრს, რომლებიც მისი თქმით, უნდა გახდეს მსჯელობის საგანი და ერთიანი პოზიციის ნაწილი. მათ შორისაა:
- პოლიტპატიმრების გათავისუფლება, მათ შორის მიხეილ სააკაშვილის;
- ბოლო ერთი წლის განმავლობაში მიღებული ბრუტალური და დრაკონული კანონების გაუქმება, მათ შორის — ცესკოსა და საარჩევნო პროცესთან დაკავშირებული ცვლილებების, რაც მისი თქმით, „კალანდარიშვილის მეთაურობით არჩევნების გამართვას შეუძლებელს ხდის“;
- ადგილობრივ არჩევნებთან ერთად პლებისციტის ჩატარება, შეკითხვით: გსურთ თუ არა, ჩატარდეს საპარლამენტო არჩევნები 2025 წლის 27 დეკემბერს?* (თარიღი, როგორც უგულავა აღნიშნავს, სამსჯელოა);
- პლებისციტში „კი“-ს გამარჯვების შემთხვევაში — „ქართული ოცნება“ გადადგება, ხოლო ზურაბიშვილ-ყაველაშვილისა და ბარიერგადალახული 4+1 სუბიექტის ეგიდით ჩამოყალიბდება გარდამავალი ტექნიკური მთავრობა, რომელიც ჩაატარებს რიგგარეშე არჩევნებს;
- „ქართული ოცნება“ იღებს ვალდებულებას გარდამავალი მთავრობის ფორმირებაში მონაწილეობაზე.
ამავე დროს, უგულავა ხაზს უსვამს, რომ მოსაფიქრებელია, რა ვალდებულებას იღებს ოპოზიცია პლებისციტში მარცხის შემთხვევაში.
„ფაქტია, ოცნებას ძალიან უნდა შეგვათრიოს ამ არჩევნებში, შესაბამისად, უნდა დავტესტოთ რამდენად დიდია ეს მათი სურვილი — რისი დამთმობები არიან“, — წერს ის.
უგულავას თქმით, ოპოზიციისთვის კრიტიკულად მნიშვნელოვანია ერთმანეთის იარლიყებით დადანაშაულების ნაცვლად, პოლიტიკური თანხმობის მიღწევა, რადგან „მხოლოდ განცხადება, არ ვმონაწილეობ, არ არის შემაკავებელი, ისევე როგორც ვმონაწილეობ – ტოვებს გარიგების და ღალატის კვალს“.
მისი აზრით, ვითარება საჭიროებს არა მხოლოდ შეთანხმებულ გეგმას, არამედ **შუამავლების ჩართვის შესაძლებლობის გადახედვასაც:
„სანამ შევძახებთ – არ მინდა შარლ მიშელი! უნდა გავაცნობიეროთ, რომ არც არავინ იხევს კალთებს. შესაძლოა ‘ოცნებასთან’ პირისპირ საუბარი მოგვიწიოს, რაც კიდევ უფრო ართულებს სიტუაციას.“
უგულავა პარტიებს, პრეზიდენტს, საზოგადოებრივ ჯგუფებსა და მოძრაობებს ერთიანი პოზიციის შესამუშავებლად დიალოგისკენ მოუწოდებს: „დრომ და სიტუაციამ მოიტანა, რომ კომპლექსური საგზაო რუკა უნდა დავდოთ.“
