ბიძინა ივანიშვილის დეპუტატებმა, პლენარულ სხდომაზე პარტიების აკრძალვის შესახებ კანონპროექტს მესამე და საბოლოო მოსმენით მხარი დაუჭირეს. კანონპროექტის წინააღმდეგი არავინ იყო.
კანონპროექტი, რომელიც “ქართული ოცნების” მიერ იყო ინიცირებული, 31 მარტს ბიუროს სხდომაზე დარეგისტრირდა და მიზნად ისახავს საკონსტიტუციო სასამართლოსთვის დამატებითი ბერკეტის მინიჭებას, რათა მან პოლიტიკური პარტიების არაკონსტიტუციური საქმიანობის ეფექტიანად შეჩერება შეძლოს.
დოკუმენტის მიხედვით, მოქალაქეთა პოლიტიკური გაერთიანებების შესახებ კანონს ემატება ახალი — 36-ე მუხლის მე-2 პუნქტი, რომლის საფუძველზეც საკონსტიტუციო სასამართლოს შესაძლებლობა ექნება აკრძალოს პარტია, რომლის გაცხადებული მიზანი, საქმიანობის არსი ან პერსონალური შემადგენლობა „არსებითად იმეორებს“ სასამართლოს მიერ უკვე აკრძალული პარტიის მახასიათებლებს.
კანონპროექტის თანახმად, სასამართლოს უფლება ექნება არ დაუშვას იმ პირებისა და ჯგუფების მიერ ახალი პარტიების დაფუძნება, რომლებიც რეალურად ადრე აკრძალულ პარტიებთან იდენტური მიზნებით მოქმედებენ და ცდილობენ არაკონსტიტუციური საქმიანობის გაგრძელებას. როგორც დოკუმენტში აღნიშნულია, ცვლილება ამოქმედდება მისი ოფიციალურად გამოქვეყნებისთანავე, ვინაიდან „ეს უკანასკნელი მისი მიზნიდან და შინაარსიდან გამომდინარე, არ ითხოვს ამოქმედების უფრო გვიანდელი ვადის დადგენას.“
შეგახსენებთ, რომ კანონპროექტის წარდგენამდე “ქართული ოცნების” ერთ-ერთმა ლიდერმა, მამუკა მდინარაძემ განაცხადა, რომ წარადგენდნენ ინიციატივას, რომელიც მიზნად ისახავს „ერთიანი ნაციონალური მოძრაობის“ მემკვიდრე პარტიების არაკონსტიტუციურად აღიარებას.
