აჭარა თაიმსის ინფორმაციით, ბათუმის მერობის კანდიდატებად ორი პირი განიხილება — გიორგი მურვანიძე და არჩილ ბერიძე. ინფორმაციას რამდენიმე ერთმანეთისგან დამოუკიდებელი წყარო გვიდასტურებს.
საჯარო ცნობების თანახმად, გიორგი მურვანიძე მუშაობდა როგორც ბათუმის რაიონული პროკურატურის გამომძიებლად, ასევე აჭარის პროკურატურის საგამოძიებო ნაწილის უფროს გამომძიებლად. 2007 წლიდან მოღვაწეობს ლევან სამხარაულის სახელობის სასამართლო ექსპერტიზის ეროვნულ ბიუროში, სადაც დღემდე ბიუროს უფროსის მოადგილედ და კრიმინალისტიკური ექსპერტიზის დეპარტამენტის ხელმძღვანელად მუშაობს.
მურვანიძემ “აჭარა თაიმსის” სატელეფონო ზარებს არ უპასუხა, თუმცა მისი კანდიდატურის შესახებ ინფორმაციას მოქმედი თანამშრომლებიც ფლობენ.
კიდევ ერთ შესაძლო კანდიდატად მომღერალი და პარლამენტის წევრი არჩილ ბერიძე სახელდება. ბერიძე ამჟამად ბათუმის დელეგატია საქართველოს პარლამენტში. იგი აქტიურად მონაწილეობს კულტურულ ღონისძიებებში — მათ შორის მღერის ბათუმის მერიის მიერ დაფინანსებულ კონცერტებზე, ასევე, სხვადასხვა რესტორანში. მისგან კომენტარის მიღება ვერ შევძელით — სატელეფონო ზარებს არ უპასუხა, ხოლო შეტყობინება, მიუხედავად წაკითხვისა, უპასუხოდ დატოვა.
შეგახსენებთ, რომ საკადრო ცვლილებები აჭარაში უკვე შეეხო ბათუმის მერს, არჩილ ჩიქოვანს პოსტი ოფიციალურად დღეს დაატოვებინეს.
აჭარა თაიმსის ინფორმაციით, რეგიონში მასშტაბური საკადრო ცვლილებები გაგრძელდება.
