ბათუმის არჩეულმა მერმა, არჩილ ჩიქოვანმა, პოსტი დატოვა. ამის შესახებ საზოგადოებას თავად ჩიქოვანმა სოციალური ქსელის მეშვეობით შეატყობინა. ის არის პირველი და ერთადერთი პირი „ქართული ოცნებიდან“ გარიცხულთა შორის, ვინც მადლობა არ გადაუხადა პარტიის დამფუძნებელ ბიძინა ივანიშვილს.
“მივიღე გადაწყვეტილება ბათუმის მერის თანამდებობის დატოვების შესახებ. ქალაქის ხელმძღვანელად ყოფნა იყო დიდი პატივი და მნიშვნელოვანი პასუხისმგებლობა. მინდა მადლობა გადავუხადო ბათუმელებს გამოცხადებული ნდობისა და მხარდაჭერისთვის, მადლობა იმ გუნდს, რომელთან ერთადაც წლების განმავლობაში ვმუშაობდი ჩვენი ქალაქის საკეთილდღეოდ. განსაკუთრებული მადლობა მინდა გადავუხადო ქართული ოცნების დიდ ოჯახს და, რა თქმა უნდა, ვრჩები ამ გუნდის ერთგულ წევრად,” -დაწერა ჩიქოვანმა.
არჩილ ჩიქოვანი არაერთ გახმაურებულ ფაქტთან იყო დაკავშირებული. როგორც ცნობილია, ბათუმის თვითმმართველობას ის არადემოკრატიული პრინციპებით მართავდა.
მისი შესაძლო გადაყენების შესახებ ცნობები მას შემდეგ გავრცელდა, რაც აჭარის მთავრობის არალეგიტიმურ თავმჯდომარედ სულხან თამაზაშვილი აირჩიეს. თამაზაშვილის დანიშვნას თორნიკე რიჟვაძის გადაყენება მოჰყვა, რომელიც ჩიქოვანის მეჯვარეა.
ინფორმაციისთვის: არჩილ ჩიქოვანი საჯარო სამსახურში საქმიანობას ჯერ კიდევ წინა ხელისუფლების დროს, 2004 წლიდან მოყოლებული ეწეოდა. სხვადასხვა პერიოდში ის მუშაობდა აჭარის პროკურატურაში, შსს ბათუმის საქალაქო სამმართველოს უფროს გამომძიებლად, ასევე სპეცოპერატიული დეპარტამენტის სპეციალური განყოფილების უფროსად.
2010 წელს ჩიქოვანი საქართველოს შსს გენერალური ინსპექციის დასავლეთის რეგიონალური სამმართველოს ინსპექტორად დაინიშნა. ამავე წელს მას საქართველოს თავდაცვის პოლიციის დეპარტამენტის აჭარის სამმართველოს უფროსის პოსტი ჩააბარეს, სადაც 2013 წლამდე მუშაობდა.
