2025 წლის მონაცემებით, საქართველოში დემოკრატიისა და ადამიანის უფლებების მდგომარეობა სერიოზულ ეჭვქვეშ დადგა, განსაკუთრებით კი ლგბტქ+ თემის დაცვის კუთხით. როგორც არასამთავრობო ორგანიზაცია — საქართველოს ახალგაზრდა იურისტთა ასოციაცია აღნიშნავს, მმართველი პარტია „ქართული ოცნება“ მიზანმიმართულად ცდილობს, ოჯახისა და ბავშვების დაცვა წარმოაჩინოს როგორც თანასწორობისა და განსხვავებულობის წინააღმდეგ ბრძოლა.
საიას შეფასებით, ეს მიდგომა ფუნდამენტურად ეწინააღმდეგება დემოკრატიულ სახელმწიფოში არსებულ სამართლებრივ პრინციპებს. ორგანიზაციის განცხადებით, „ქართული ოცნების“ პოლიტიკა ცდილობს საზოგადოებაში ჰომოფობიური განწყობების ინსტიტუციონალიზებას, რაც არა მხოლოდ ლგბტქ+ ადამიანებს უქმნის სერიოზულ საფრთხეს, არამედ მთლიანად აზიანებს ქვეყანაში არსებულ ადამიანის უფლებების მდგომარეობას.
2024 წლის აპრილში მმართველმა პარტიამ დააინიცირა საკონსტიტუციო ცვლილებების პროექტი, რომელიც, საიას შეფასებით, აშკარად დისკრიმინაციულ ხასიათს ატარებდა. თუმცა, საკონსტიტუციო უმრავლესობის არარსებობის გამო, ცვლილება ვერ დამტკიცდა. მიუხედავად ამისა, პარლამენტმა მაინც მიიღო კანონი „ოჯახური ღირებულებებისა და არასრულწლოვანთა დაცვის შესახებ“, რომელსაც თან ახლდა ცვლილებები 18 სხვადასხვა კანონმდებლობაში.
საიას განცხადებით, მიღებული საკანონმდებლო ცვლილებები მნიშვნელოვნად ზღუდავს გამოხატვისა და შეკრების თავისუფლებას, ამყარებს ცენზურას სამეცნიერო, აქტივისტურ და პროფესიულ საქმიანობაზე, და ქმნის სივრცეს, სადაც ჰომოფობიური და ტრანსფობიური რიტორიკა ფაქტობრივად სახელმწიფო პოლიტიკად ყალიბდება. კანონმდებლობაში გაწერილი ადმინისტრაციული და სისხლისსამართლებრივი სანქციები მიმართულია იმგვარი ქმედებების წინააღმდეგ, რომლებიც განიხილება როგორც ლგბტქ+ თემის მხარდაჭერა, რაც, ორგანიზაციის შეფასებით, პირდაპირ ემიჯნება საერთაშორისო სამართლის ნორმებს და საქართველოს მიერ ნაკისრ ვალდებულებებს.
საია მიუთითებს, რომ „ქართული ოცნების“ მიერ განხორციელებული პოლიტიკა ოჯახის დაცვას განიხილავს როგორც არაჰეტეროსექსუალური იდენტობებისა და მრავალფეროვნების წინააღმდეგ მიმართულ იარაღს. „სწორედ ეს მიდგომაა განსაკუთრებით სახიფათო, რადგან ქმნის შთაბეჭდილებას, თითქოს თანასწორობა და ოჯახის დაცვა ერთმანეთის საწინააღმდეგოა — რაც არ შეესაბამება არც სამართლებრივ რეალობას და არც ბავშვთა ინტერესების დაცვას,“ — ნათქვამია ორგანიზაციის განცხადებაში.
არასამთავრობო ორგანიზაცია ყურადღებას ამახვილებს იმაზეც, რომ ახალი კანონები ეწინააღმდეგება ადამიანის უფლებათა ევროპული სასამართლოს მიერ მიღებულ გადაწყვეტილებებს, რომლებიც საქართველოსთვის სავალდებულოა. ამას ადასტურებს ის ფაქტიც, რომ 2025 წლის მარტში ევროპის საბჭოს მინისტრთა კომიტეტმა საქართველოს ოფიციალურად მოუწოდა ანტი-ლგბტქ+ კანონის გაუქმებისკენ. იმავე შინაარსის მოწოდება გააკეთა გაეროს ბავშვთა უფლებების კომიტეტმა ჯერ კიდევ 2024 წლის მაისში.
მესამე სექტორი ხაზგასმით აღნიშნავს, რომ მმართველი პარტიის რიტორიკა და პოლიტიკა, რომელიც ადამიანის უფლებათა დაცვას ჰომოფობიურ დღის წესრიგს უპირისპირებს, ქმნის სახიფათო პრეცედენტს — სახელმწიფო აღარ არის ადამიანის უფლებების გარანტი, არამედ მათი პირდაპირი დამრღვევი ხდება. საიას თქმით, ასეთ პირობებში, ნებისმიერი მოქალაქე — განურჩევლად სექსუალური ორიენტაციისა ან გენდერული იდენტობისა — შეიძლება აღმოჩნდეს რეპრესიული პოლიტიკის სამიზნე, მხოლოდ განსხვავებული აზრის ან გამოხატვის გამო.
საია მმართველ პარტიას მოუწოდებს, შეწყვიტოს სიძულვილის ენაზე დაფუძნებული პოლიტიკური კამპანია და უზრუნველყოს საქართველოს კონსტიტუციითა და საერთაშორისო ვალდებულებებით გათვალისწინებული ძირითადი უფლებებისა და თავისუფლებების დაცვა ყველა მოქალაქისთვის.
ინფორმაციისთვის: 17 მაისი არის ჰომოფობიასთან, ბიფობიასთან და ტრანსფობიასთან ბრძოლის საერთაშორისო დღე — თარიღი, რომელსაც ლგბტქ+ თემის წევრები და მხარდამჭერები მთელ მსოფლიოში, მათ შორის საქართველოშიც, იყენებენ თანასწორობაზე, ღირსებაზე და უსაფრთხოებაზე საუბრისთვის.
საპატრიარქომ ამავე დღეს დააწესა „ოჯახის სიწმინდის დღე“. ეს გადაწვეტილება აშკარად გამიზნული იყო — ლგბტქ+ თემის ხილვადობის წინააღმდეგ, შედეგად, 17 მაისს საქართველოში უკვე წლებია ორი განსხვავებული გზავნილი ეჯახება ერთმანეთს — ერთი, რომელიც თანასწორობასა და ადამიანის უფლებებს ეხება, და მეორე, რომელიც ტრადიციული ღირებულებების სახელით ამავე უფლებების წინააღმდეგ მობილიზდება.
