ბათუმში, ტბელ აბუსერიძის #29ა-ში ავარიული კორპუსის დემონტაჟი განხორციელდა, ტერიტორიაზე კი 37 სართულიანი ცათამბჯენის მშენებლობაა დაგეგმილი. შპს „ბათუმი გარდენ ქიი“-მ საკადასტრო კოდით გათვალისწინებული ტერიტორიის გარდა, ლითონის ღობით სამანქანე გზაც შეღობა.
ცენტრალური გზის მხარეს მთლიანად ათვისებულია ტროტუარი. აქ ქვეითებს გადაადგილება რისკის ფასად უწევთ. კომპანიამ მოქალაქეებისთვის დროებითი ტროტუარისთვის აუცილებელი კონსტრუქციაც არ მოაწყო.
როგორც ადგილობრივები ამბობენ, 6 თვეზე მეტია გზით სარგებლობა შეზღუდულია, რის გამოც სახლში მისვლა ალტერნატიული გზით უწევთ. საავტომობილო გზის გაუქმების გამო, დანიშნულების ადგილზე მისვლა ურთულდებათ სასწრაფო სამედიცინო დახმარების ჯგუფებსა და ტაქსის.
„როდესაც კორპუსის დემონტაჟი დასრულდა, ტერიტორიის შემოღობვა დაიწყეს და ჩვენ სახლთან მისასვლელი გზაც აითვისეს. ახლა მეზობელი კორპუსის ეზოთი ვსარგებლობთ. სამუშაოების მიმდინარეობისას განათების ბოძებიც აიღეს. სიბნელის გამო, ჩვენი მეზობელი დაეცა და ცხვირი დაიზიანა, მას სამედიცინო ჩარევა დასჭირდა,“ – უყვება „აჭარა თაიმს“ მიმდებარე ტერიტორიაზე მცხოვრები.
უკანონობას სხვა მეზობლებიც ხედავენ, თუმცა პრობლემაზე საჯაროდ საუბარი არ სურთ. როგორც თავად ამბობენ ამ ეტაპზე ინვესტორის გაღიზიანება არ სურთ.
„ეს ინვესტორი ჩვენი კორპუსის აღებასაც აპირებს და ახლა მოლაპარაკეკბები გვაქვს, მე ვერაფერს გეტყვით, არ მინდა ჩემი სიტყვით გაღიზიანდეს და წავიდეს. ძველ კორპუსში ვცხოვრობთ და იქნებ გვეშველოს,“ – გვიყვება ერთ-ერთი ადგილობრივი, რომელიც ვინაობს არ გვიმხელს.
როგორ ვერ შენიშნა მაკონტროლებელმა 6 თვის განმავლობაში უკანონოდ შეღობილი საავტომობილო გზა? კითხვაზე პასუხი ვერ მივიღეთ. ორ დღიანი ლოდინის შემდეგ ბათუმის მუნიციპალურ ინსპექციაში გვითხრეს, რომ ამ თემაზე კომენტარს არ გააკეთებენ.
„ბათუმელების“ ინფორმაცით, შპს „ბათუმი გარდენ ქიის“ დირექტორი მამუკა შუბალიძეა. ის კომპანიის 49 პროცენტს ფლობს, 51 პროცენტი კი უკრაინის მოქალაქეს, იევჰენიი ლისიცინს ეკუთვნის.
