სურსათის ეროვნული სააგენტო საზამთროსა და ნესვის ნიტრატების შემცველობის მონიტორინგს აგრძელებს. ბოლო შემოწმების ფარგლებში, რომელიც მონიტორინგის სახელმწიფო კონტროლის პროგრამის ფარგლებში ჩატარდა, მთელი ქვეყნის მასშტაბით სხვადასხვა სარეალიზაციო ობიექტიდან აღებული 41 ნიმუში აკრედიტებულ ლაბორატორიაში შეისწავლეს.
დღეის მდგომარეობით, სამომხმარებლო ბაზარზე ძირითადად იმპორტირებული ბაღჩეულია წარმოდგენილი. ჩატარებული კვლევის შედეგად დადგინდა, რომ 41 ნიმუშიდან მხოლოდ ორ შემთხვევაში ნიტრატების შემცველობამ კანონის მიერ დადგენილ ზღვარს — 90 მილიგრამ/კილოგრამს — გადააჭარბა.
კერძოდ, ერთ ნესვის ნიმუშში ნიტრატების რაოდენობა მცირედით — 98.3 მგ/კგ იყო, ხოლო მეორე შემთხვევაში მნიშვნელოვნად — 140 მგ/კგ-ს შეადგენდა. ორივე შემთხვევა ნესვს უკავშირდება.
სურსათის ეროვნული სააგენტოს ცნობით, აღნიშნულ დარღვევებზე კანონმდებლობით გათვალისწინებული ღონისძიებები გატარდა. ბიზნესოპერატორს დაევალა შესაბამისი სურსათის ბაზრიდან ამოღება და გამოთხოვა, რათა მოხმარებაში არ მოხვდეს ჯანმრთელობისთვის პოტენციურად საფრთხის შემცველი პროდუქტი.
