TV25 იტყობინება, რომ სამაუწყებლო კომპანიის ჟურნალისტსა და ოპერატორს თავს დაესხნენ. მათივე ცნობით, გადამღები ჯგუფი ე.წ. “ოცნების ქალაქში” მიმდინარე სამშენებლო პროცესის გადაღებას აწარმოებდა, რა დროსაც მათ სამუშაოების ზედამხედველები ფიზიკურად, ასევე, სიტყვიერად გაუსწორდნენ.
“ჩვენს რეპორტიორს და ოპერატორს ე.წ. „ოცნების ქალაქში“ ჟურნალისტურ საქმიანობაში ხელი შეუშალეს. „მაცნეს“ კამერა ადგილზე უკიდურესად გაჭირვებული მოქალაქეებისთვის აშენებული კორპუსების გადაღების მიზნით იმყოფებოდა, თუმცა თეო ფუტკარაძეს იქ დასაქმებულები დაუპირისპირდნენ და ღია სივრცეში გადაღების უფლება არ მისცეს. იყო სიტყვიერი შეურაცხყოფა და აგრესია.
რამ გამოიწვია მათი გაღიზიანება, ჩვენთვის უცნობია, თუმცა წინააღმდეგობას იქ მომუშავეები უსაფრთხოების დაცვის მოტივით ხსნიდნენ. საცხოვრებელი კორპუსების პროექტს ე.წ ოცნების ქალაქში აჭარის ფინანსთა და ეკონომიკის სამინისტრო ახორციელებს”, – წერია არხის მიერ გავრცელებულ ინფორმაციაში.
ინფორმაციისთვის: ძალადობისა და პროფესიული საქმიანობის ხელშეშლის ფაქტზე გამოძიება ამ დრომდე არ დაწყებულა.
