ბათუმში, აივნის მოაჯირის ჩამოვარდნის შედეგად ორი ავტომობილი დაზიანდა. შემთხვევა კობალაძის ქუჩაზე, “ორბი ჯგუფის” ერთ-ერთ კომპლექსში მოხდა. რკინის მძიმე კონსტრუქციამ ავტომობილების მინები ჩაამსხვრია. ტრანსპორტი დაზიანებულია სხვა მხრივაც. ზარალის ოდენობა, როგორც ავტომობილების მფლობელები ამბობენ საკმაოდ დიდია.
ერთ-ერთი ავტომობილის მფლობელი, ლაშა ველიაძე სოციალურ ქსელში წერს, რომ ზიანის ანაზღაურების მიზნით “ორბს” მიმართა, რაზეც კომპანიამ უარი განაცხადა.
“კომპანია “ორბი”-ს შენობას მოწყდა “ევროსტანდარტებით დამონტაჟებული” მოაჯირი და დაეცა ჩემი მეუღლის ავტომობილს. დაზიანებას თავადაც ხედავთ. მაქსიმალურად კონსტრუქციულად ვეცადე პრობლემის მოგვარება. გადავწყვიტე წერილობით მიმემართა კომპანიისთვის ზარალის ანაზღაურების თაობაზე. კანცელარიაში რამდენჯერმე დამჭირდა მისვლა იმისთვის რომ მინიმუმ განცხადება ჩაებარებინათ.
მიპასუხეს: “ზევით” თუ არ გაქვთ ვინმესთან შეთანხმებული განცხადებას ვერ ჩავიბარებთო. ნუ მოკლედ რომ ვთქვა მივაღწიე იმას რომ განცხადება დავტოვე (ხარჯთაღრიცხვით). პარალელურად შინაურ-ნაცნობ-ახლობლების მეშვეობით ვცდილობდი კომპანია კეთილ ნებამდე მისულიყო და ზარალი აენაზღაურებინა. საბოლოოდ გადაწყდა ისე, რომ არაფერსაც არ ანაზღაურებენ და საკმაოდ დიდი ზარალი, რომელსაც ხარჯთაღრიცხვაში ხედავთ დარჩა ჩემი გადასახდელი,” – წერს ლაშა ველიაძე ფეისბუქში.
ველიაძე უფლებების დაცვას სამართლებრივი გზით აპირებს. მისი თქმით, ახლა იურისტებთან კონსულტაციას გადის, რის შემდეგაც სასამართლოს მიმართავს.
“უპასუხისმგებლო, უნიათო, უხარისხო და ძალიან ცუდი კანტორა ხართ, რა თქმა უნდა ეს კომპანიის მაღალ ეშელონებს გეხებათ. თუ ფიქრობთ რომ ასე მარტივად “მოიგვარეთ” ეს პრობლემა ძალიან ცდებით. აუცილებლად შევხვდებით სასამართლოში და ზარალთან შეფარდებით ორმაგის დახარჯვაც რომ მომიწიოს მაინც ვიბრძოლებ უსამართლობის განცდის გასაქრობად. თქვენგან განსხვავებით სიმართლე და ღირსება ჩემთვის მთავარი ღირებულებაა,” – აღნიშნავს ლაშა ველიაძე.
“აჭარა თაიმსი” კომპანია “ორბის” საზოგადოებასთან ურთიერთობის წარმომადგენელს დაუკავშირდა, თუმცა მან ჩვენს ზარს არ უპასუხა. იმ შემთხვევაში თუ კომპანია მოგვიანებით გვიპასუხებს კითხვებზე მასალა განახლდება.
