ბათუმის მერიის ინფორმაციით, წვიმისა და დატბორვის გამო, ქალაქში 100-ზე მეტი ზარი შევიდა. მერიის ცნობით, დატბორვა დაახლოებით 10 ქუჩაზე დაფიქსირდა.
მათივე მტკიცებით, მთელი ღამის განმავლობაში მიმდინარეობდა წყლის ამოტუმბვის სამუშაოები. დარჩენილ ადგილებზე კი, მერიის განცხადებით, მიმდინარეობს მოსახლეობასთან უკუკავშირი, რათა სამუშაოების საჭიროება განისაზღვროს.
მერიაში აცხადებენ, რომ წყალმომარაგების მიმართულებით შეფერხება არ დაფიქსირებულა. მეწყრული პროცესები დაახლოებით 10 ადგილზე განვითარდა, მათ შორის მწვანე კონცხის, ურეხისა და გონიო-კვარიათის მიმართულებით, ასევე ქალაქთან შემოერთებულ ტერიტორიებზე.
მერიის ინფორმაციით, თითოეულ შემთხვევაში დაიგეგმება შესაბამისი ღონისძიებები, მათ შორის ფერდსამაგრი კედლების მოწყობა. დატბორილ მონაკვეთებზე შეფერხებით მოძრაობდა მუნიციპალური ტრანსპორტი. მარშრუტების ცვლილება გზებზე არსებული ვითარების მიხედვით ხორციელდებოდა. ელექტროავტობუსების გადაადგილება დროებით შეჩერებული იყო, თუმცა ამ დროისთვის მოძრაობა აღდგენილია.
რაც შეეხება დაზარალებულ მოსახლეობას, ბათუმის მერიის განცხადებით, მიყენებული ზიანის ანაზღაურების საკითხს სტიქიის შედეგების სალიკვიდაციო კომისია განიხილავს და დადგენილი წესის შესაბამისად მოხდება ზიანის ანაზღაურება.
ბათუმის დატბორვის დროს მერი შვებულებაში იყო
ბათუმში წვიმის შედეგად ქუჩები დაიტბორა
გარემოს ეროვნული სააგენტოს მტკიცებით, ბათუმში სექტემბრისთვის უპრეცედენტო ნალექი დაფიქსირდა
„ყოველ დღე საფრთხეში გვიწევს ცხოვრება“ – ავარიულ სახლში მცხოვრები ოჯახი დახმარებას ითხოვს
