აიკრძალოს პიროტექნიკა – მოსახლეობა სახელმწიფო უწყებებს თხოვნით მიმართავს. ონლაინ შექმნილ პეტიციას 25 683-მა მოქალაქემ მოაწერა ხელი.
ხელმომწერების ადრესატი საქართველოს მთავრობა, პრეზიდენტი, პარლამენტი და გარემოს დაცვისა და სოფლის მეურნეობის სამინისტროა.
როგორც პეტიციაში ვკითხულობთ, საქართველოში დადგენილ ნორმებთან შეუსაბამო და დაბალი ხარისხის ასაფეთქებელი ნივთიერებები შემოდის, რაც მოქალაქეების, მათ შორის არასრულწლოვნების დაზიანებას იწვევეს.
“საქართველოში პიროტექნიკის ყიდვა-გაყიდვა, ფლობა და მოხმარება ფაქტობრივად არ კონტროლდება. საგანგაშოა, რომ ქვეყანაში არც ერთი უწყება არ არის პასუხისმგებელი შემოტანილი პიროტექნიკის ხარისხზე. უხარისხო, ან დაბალი ხარისხის ასაფეთქებელი ნივთიერებების გამოყენების დროს მოქალაქეების მიერ არ არის დაცული უსაფრთხოების ნორმები,” – წერია განცხადებაში.
პეტიციაში ადამიანის ჯანმრთელობის გარდა, ყურადღება გამახვილებულია მიუსაფარი ცხოველების უსაფრთხოებაზე. 25 683 მოქალაქე სახელმწიფოსგან პიროტექნიკის ყიდვა-გაყიდვის მკაცრ რეგულირებას მოითხოვს.
“ვთხოვთ და მოვუწოდებთ საქართველოს პარლამენტს, გაითვალისწინოს ის უდიდესი ზიანი, რომელსაც ადამიანებს, ცხოველებსა და გარემოს აყენებს პიროტექნიკის უკონტროლო გამოყენება და უმოკლეს ვადებში დაიწყოს „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ და „საქართველოს სისხლის სამართლის კოდექსში ცვლილების შეტანის შესახებ“ (07-3/305/10) კანონპროექტების განხილვა, რათა მაქსიმალურად შევამციროთ ის ზიანი, რაც გარდაუვალია საახალწლო პერიოდში,” – აღნიშნულია განცხადებაში.
ცნობისთვის, 2023 წლის 28 მარტს საქართველოს პარლამენტში ინიცირებლ იქნა კანონპროექტი, რომლის თანახმადაც პიროტექნიკის ყიდვა-გაყიდვა, ფლობა და გამოყენება მკაცრი რეგულაციების ქვეშ ექცეოდა. თუმცა, პროექტი ჯერაც არ არის განხილული პარლამენტის მიერ.
