Fox News-ის მიერ გავრცელებული ინფორმაციის მიხედვით, აშშ-ის სახელმწიფო დეპარტამენტი 75 ქვეყნის მოქალაქეებისთვის ვიზების გაცემის პროცესს დროებით აჩერებს. აღნიშნულ ჩამონათვალში მოხვდა საქართველოც, ისევე როგორც სამხრეთ კავკასიის სხვა ქვეყნები – სომხეთი და აზერბაიჯანი.
მედიის ცნობით, სახელმწიფო დეპარტამენტის შიდა მემორანდუმი, რომელიც პირველად Fox News Digital-მა მოიპოვა, საკონსულო სამსახურებს ავალდებულებს, მოქმედი კანონმდებლობის საფუძველზე ვიზების გაცემაზე უარი თქვან, ვიდრე სკრინინგისა და შემოწმების არსებული პროცედურები სრულად არ გადაიხედება.
Fox News-ის ინფორმაციით, გადაწყვეტილების მიზანია იმ აპლიკანტების გაფილტვრა, რომლებიც აშშ-ის შეფასებით, შესაძლოა მომავალში „საზოგადოებრივ ტვირთად“ იქცნენ და სახელმწიფოს სოციალური მხარდაჭერის სისტემაზე დამოკიდებულნი გახდნენ.
ვიზების გაცემის შეჩერების პროცესი 21 იანვრიდან დაიწყება და განუსაზღვრელი ვადით გაგრძელდება. პროცედურის აღდგენა დამოკიდებული იქნება იმაზე, თუ როდის დაასრულებს სახელმწიფო დეპარტამენტი სავიზო პოლიტიკის გადაფასებასა და უსაფრთხოების მექანიზმების გადახედვას.
