დახვრეტების ადგილზე ძმათა სასაფლაოსა და მუზეუმის მოწყობა უმნიშვნელოვანესია მსხვერპლთათვის პატივის მიგების, ასევე, მათი ოჯახებისთვის, ასე ფიქრობენ “ინფორმაციის თავისუფლების განვითარების ინსტიტუტში”.
ამ გადაწყვეტილებით კი ორგანიზაციაში მიაჩნიათ, რომ ახალი საგანმანათლებლო სივრცე შეიქმნება. გარდა ამისა, აღნიშნული ნაბიჯი მნიშვნელოვან წვლილს შეიტანს საბჭოთა წარსულის გააზრებისა და დეკომუნიზაციის პროცესში.
არასამთავრობო ორგანიზაციის წარმომადგენლებმა რეკომენდაციები ბათუმში, იმ შეხვედრაზე წარადგინეს, სადაც ბათუმისა და ლაზეთის ეპარქიის მიწვევით იმყოფებოდნენ. შეხვედრას ასევე, მუსლიმთა სამმართველოსა და ფონდ “მემორიალის” წარმომადგენლები ესწრებოდნენ.
“სხდომისას ანტონ ვაჭარაძემ 2023 წლის 11-16 დეკემბერს ბათუმისა და ლაზეთის ეპარქიის წარმომადგენლებთან ერთად პოლონეთში ვიზიტის შედეგები წარადგინა, რომლის ფარგლებშიც პოლონეთში კომუნისტური და ნაცისტური რეჟიმების მსხვერპლთა ხსოვნისადმი მიძღვნილ საუკეთესო პრაქტიკებსა და მუზეუმებს გაეცნენ. IDFI-მ გამოყო მუზეუმისა და მემორიალურ ძმათა სასაფლაოს საუკეთესო პრაქტიკები და შეიმუშავა რეკომენდაციები.
ანტონ ვაჭარაძემ სხდომაზე განიხილა შემდეგი მუზეუმები: სიბირის მემორიალური მუზეუმი (The Sybir Memorial Museum), კატინის მუზეუმი (The Katyń Museum) მარტიროლოგიისა და ისტორიული მეხსიერების მუზეუმი მიხნიოვში (The mausoleum of martyrology and historical museum in Michniów) და პალმირის მუზეუმი-მემორიალი (Museum-Memorial Palmiry). აგრეთვე, დიზაინ სტუდია ნიზიო (Nizio Design International), რომელიც ერთ-ერთი აქტიური სტუდიაა არა მხოლოდ პოლონეთში, არამედ მთელ ევროკავშირში და სპეციალიზებულია მუზეუმების, ისტორიული, მუდმივი და დროებითი გამოფენებისა და მემორიალების დიზაინში,” – წერია IDFI-ის მიერ გავრცელებულ ინფორმაციაში.
