„აჭარა თაიმსის“ ინფორმაციით, მახინჯაურის სანაპიროსთან ახლოს, ზღვაში, სავარაუდოდ, საბრძოლო დანიშნულების სამხედრო აღჭურვილობა ტივტივებს.
ფოტო „აჭარა თაიმსს“ მოქალაქემ მიაწოდა. თვითმხილველის თქმით, შემთხვევა მაშინ შენიშნეს, როდესაც კატერით ზღვაში სეირნობდნენ. წყალში მცურავი ობიექტი, მოქალაქის შეფასებით, სამხედრო დანიშნულების საბრძოლო მასალაა და ის ვარაუდობს, რომ ის რუსული წარმოებისაა.
ღია წყაროების მიხედვით კი, ანალოგიური ტიპის საბრძოლო მასალა თურქეთის აკვატორიაშიც დაფიქსირდა. თურქული მედიის ცნობით, ერთ-ერთ შემთხვევაში რაკეტა, სავარაუდოდ, რუსეთის მიერ ოკუპირებული აფხაზეთის ტერიტორიიდან იყო გაშვებული, თუმცა კურსიდან გადახრის გამო შავ ზღვაში, თურქეთის სანაპიროსთან ჩავარდა.
განახლება: შინაგან საქმეთა სამინისტრომ „აჭარა თაიმსის“ მიერ გავრცელებული ინფორმაციის შემდეგ გამოძიება სისხლის სამართლის კოდექსის 236-ე მუხლით დაიწყო, რაც ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენას, შენახვას, ტარებას, დამზადებას, გადაზიდვას, გადაგზავნას ან გასაღებას გულისხმობს.
