„ენერგეტიკისა და სუფთა ჰაერის კვლევის ცენტრმა“ გამოაქვეყნა ანგარიში, რომლის მიხედვითაც არსებობს ეჭვი, რომ ბათუმის ნავთობის ტერმინალი და პორტი რუსული ნავთობპროდუქტების შერევასა და მათი წარმომავლობის შეცვლას ახდენს, რის შემდეგაც პროდუქცია ევროკავშირისა და გაერთიანებული სამეფოს სანქციების დამწესებელ ქვეყნებში ექსპორტირდება.
ანგარიშის ავტორების შეფასებით, ბათუმისა და ყულევის პორტებმა ევროკავშირის მიერ რუსული ნავთობპროდუქტების აკრძალვიდან სამი წლის განმავლობაში სანქციების დამწესებელ ქვეყნებში დაახლოებით 1,2 მილიარდი ევროს ღირებულების ისეთი გადამუშავებული საწვავი გაიტანეს, რომელიც, სავარაუდოდ, რუსული ნავთობისგან იყო წარმოებული.
CREA აღნიშნავს, რომ ბათუმის პორტი, რომელიც საქართველოს სარკინიგზო ქსელთან არის დაკავშირებული, შესაძლოა გამოყენებული იყოს რუსული ნავთობპროდუქტების შერევის, ხელახალი მარკირებისა და რეექსპორტისთვის.
ორგანიზაციის შეფასებით, სწორედ ეს გარემოება ართულებს ნავთობპროდუქტების რეალური წარმოშობის დადგენას და სანქციების აღსრულებას.
ანგარიშში ასევე საუბარია ბათუმის ნავთობის ტერმინალის წარსულ საქმიანობაზე. დოკუმენტის მიხედვით, ტერმინალს ადრე უკავშირდებოდა რეგულაციური და სამართლებრივი საკითხებიც, მათ შორის ბრალდებები საბაჟო კონტროლის გვერდის ავლით 10 000 ტონაზე მეტი ნედლი ნავთობის გადატანასთან დაკავშირებით.
CREA ევროკავშირს რეკომენდაციას აძლევს, გაამკაცროს კონტროლი მესამე ქვეყნების პორტებიდან იმპორტირებულ ნავთობპროდუქტებზე, რათა გამოირიცხოს რუსული ნავთობის შემცველი საწვავის სანქციების გვერდის ავლით ევროპულ ბაზარზე მოხვედრა.
