პროტესტის მეექვსე დღე და უცვლელი მთხოვნები – აჭარაში დემოსტრაციები არ წყდება. დღეს მოსწავლეების, პედაგოგების, შშმ პირებისა და რიგითი მოქალაქეების აქციები, ქალაქის რამდენიმე ადგილზე გაიმართა. მათი მოთხოვნები კვლავ უცვლელია.
დღის ბოლოს, აჭარის მთავრობასთან გამართულ ხალხმრავალ აქციაზე ვითარება რამდენჯერმე დაიძაბა, რის გამოც სპეცრაზმის მობილიზება მოხდა. მთავრობის ადმინისტრაციისა და საკონსტიტუციო სასამართლოს წინ, ბიძინა ივანიშვილის ფიტული დაწვეს.
“ბოლო იმედი იყო საკონსტიტუციო სასამართლო, რომელიც ჩაგვიხურეს. სპეცრაზმელებს მივმართავ დაფიქრდით, მოვა დრო ერთად მოგვიწევს ბრძოლა. ძნელია გადაწყვეტილების მიღება, როცა არის დრო, რომ უნდა მიიღო და დადგეთ სწორ მხარეს. ჩვენმა წინაპრებმა სისხლი დაღვარეს დამოუკიდებლობისთვის, ასე რომ, ყველამ ავიღოთ ჩვენს თავზე და ქვეყანა ევროკავშირის ოჯახში დავაბრუნოთ”, – სკანდირებდნენ აქციის მონაწილეები.
დემოსტრანტებმა მოგვიანებით, მსვლელობით ბათუმის ქუჩები მოიარეს, მათ შორის ბაქოს ქუჩაზე, ბათუმის შემოსასვლელი და გასასვლელი თითქმის ერთი საათით გადაკეტეს.
“ხელისუფლება იძალადებს? უფრო მეტი გამოვალთ და დავუპირისპირდებით რუსულ რეჟიმს. გადავკეტავთ ყველა ქუჩას და ჩვენ ხმას გაიგებენ ყველგან. ამ ისტორიულ შანს საქართველო არ დაკარგავს, რადგან ქვეყნის უმრავლესობას ევროპული მომავალი სურს”, – აცხადებდნენ აქციის მონაწილეები.
ისინი ასევე, აჭარის არაკონსტიტუციური უმაღლესი საბჭოს თავმჯდომარის სახლთან მივიდნენ. “მონა, მონა, ფიქტიური უმაღლესი საბჭოს თავმჯდომარე,” – სკანდირებდნენ დემოსტრანტები.
[embedyt] https://www.youtube.com/watch?v=ErYQjRYA-n8[/embedyt]
