გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის მიერ 2025 წლის მაისში მთელი ქვეყნის მასშტაბით უკანონო ტყითსარგებლობის 89 ფაქტი გამოვლინდა, რომელთაგან 21 ფაქტი აჭარის რეგიონზე მოდის — რაც ერთ-ერთ ყველაზე მაღალი მაჩვენებელია საქართველოს მასშტაბით (იგივე რაოდენობა დაფიქსირდა სამეგრელო-ზემო სვანეთშიც).
დეპარტამენტის მიერ გავრცელებული ინფორმაციის თანახმად, გამოვლენილი 89 ფაქტიდან:
- 62 შემთხვევა უკავშირდება ხე-ტყის უკანონო მოპოვებას ან ტრანსპორტირებას;
- 27 ფაქტი — ტექნიკური რეგლამენტის დარღვევასა და არალეგალური სახერხი საამქროების საქმიანობას;
- მათ შორის 6 ფაქტს სისხლის სამართლის დანაშაულის ნიშნები აქვს.
მაისის თვის განმავლობაში რეგიონების მონაცემები ასე გადანაწილდა:
- აჭარა — 21 ფაქტი;
- სამეგრელო-ზემო სვანეთი — 21 ფაქტი;
- კახეთი — 17 ფაქტი;
- იმერეთი — 11 ფაქტი;
- ქვემო ქართლი და სამცხე-ჯავახეთი — თითოეულში 5 ფაქტი;
- მცხეთა-მთიანეთი — 4 ფაქტი;
- შიდა ქართლი — 3 ფაქტი;
- გურია და რაჭა-ლეჩხუმი-ქვემო სვანეთი — თითო-თითო ფაქტი
ოფიციალური ინფორმაციით, დეპარტამენტის თანამშრომლების მიერ ამოღებულია 67 კუბურ მეტრზე მეტი მოცულობის უკანონოდ მოპოვებული ხე-ტყე. გარდა ამისა, დალუქულია 4 არარეგისტრირებული სახერხი საამქრო, რომლებიც კანონდარღვევით ფუნქციონირებდნენ.
“ყველა შემთხვევაზე შედგენილია შესაბამისი სამართალდარღვევის ოქმები და მასალები გადაგზავნილია შესაბამის უწყებებში შემდგომი რეაგირებისთვის. სისხლის სამართლის ნიშნების შემცველი ფაქტები გადაეცა სამართალდამცავ ორგანოებს,” – აცხადებენ დეპარტამენტში.
