რომში ვიზიტის ფარგლებში, საქართველოს საგარეო საქმეთა მინისტრის მოადგილემ, გიორგი ზურაბაშვილმა და იტალიაში საქართველოს პოლიციის ატაშემ, ვლადიმერ ბორცვაძემ, შეხვედრა გამართეს იტალიის რესპუბლიკის ტრანსპორტისა და ინფრასტრუქტურის სამინისტროში. შეხვედრის მთავარი თემა იყო მართვის მოწმობების ურთიერთაღიარების საკითხი, რაც დიდი მნიშვნელობის მატარებელია იტალიაში მცხოვრები ათასობით ქართველი მიგრანტისთვის.
შინაგან საქმეთა სამინისტროს ინფორმაციით, შეთანხმების მიღწევის შემთხვევაში, ქართველ მოქალაქეებს იტალიური მართვის მოწმობის მისაღებად აღარ დასჭირდებათ დამატებითი გამოცდის ჩაბარება, რაც მათ სოციალური ინტეგრაციისა და შრომის ბაზარზე წვდომის თვალსაზრისით დიდ შეღავათს გაუწევს.
შეხვედრაზე მხარეებმა განიხილეს შეთანხმების შინაარსობრივი დეტალები და გამოთქვეს იმედი, რომ პროცესის ოპერატიულად დასრულების შემდეგ ხელმოწერა რეალობად იქცევა.
სხვა ქვეყნებთან საქართველოს ანალოგიური შეთანხმებები უკვე გაფორმებული აქვს, მათ შორისაა: ესპანეთი, საბერძნეთი და ირლანდია.
