ბრატისლავა 2025-ის ბერძნულ-რომაული სტილით ჭიდაობის ევროპის ჩემპიონატზე, საქართველოს ნაკრებმა ჯამში ოთხი მედალი მოიპოვა, მათ შორის ორი — აჭარელმა სპორტსმენებმა.
რამაზ ზოიძემ, რომელიც სანაკრებო დონეზე სადებიუტო ევროპის ჩემპიონატს ატარებდა, უმაღლესი შედეგით გამოირჩა და ვერცხლის მედლის მფლობელი გახდა. 77 კგ წონით კატეგორიაში მოჭიდავე ზოიძემ ფინალურ შეხვედრაში სომხეთის წარმომადგენელ მალხას ამოიანთან იჭიდავა და დაძაბულ ბრძოლაში 3:1 დამარცხდა, რის შედეგადაც ვიცე-ჩემპიონობის ტიტულს დასჯერდა.
კიდევ ერთი წარმატება აჭარიდან — გელა ბოლქვაძემ, რომელმაც 82 კგ წონით კატეგორიაში ბრინჯაოს მედალი მოიპოვა. მესამე ადგილისთვის შეხვედრაში ბოლქვაძემ სომეხი მოჭიდავე სამველ გრიგორიანი 3:1 დაამარცხა, რითაც კარიერაში კიდევ ერთი საერთაშორისო ჯილდო შეიმატა.
საქართველოს ბერძნულ-რომაული სტილით ჭიდაობის ნაკრებმა ევროპის ჩემპიონატი ოთხი მედლით დაასრულა: ერთი ვერცხლი და სამი ბრინჯაო.
ტურნირი, სახელწოდებით „ბრატისლავა 2025“, 7-13 აპრილს სლოვაკეთში ჩატარდა. შეჯიბრება ათ წონით კატეგორიაში გაიმართა: 55, 60, 63, 67, 72, 77, 82, 87, 97 და 130 კგ.
ავტორი: დიმიტრი გორგილაძე
