„დინამო ბათუმი“ გუნდის გაძლიერებას განაგრძობს. „თოლიებმა“ ებრაული „ჰაპოელ იერუსალიმის“ კაპიტანი, 26 წლის ავაკა ეშეთე დაიმატეს. ინფორმაციას ამის შესახებ თავად კლუბი ავრცელებს.
„საფეხბურთო კლუბი „დინამო ბათუმი“ მოხარულია გაცნობოთ, რომ ისრაელელი საყრდენი ნახევარმცველი ავაკა ეშეთე კარიერას ჩვენს კლუბში განაგრძობს. ფეხბურთელმა სამედიცინო შემოწმება სამშობლოში გაიარა, რის შემდეგაც „დინამოსთან“ ხელშეკრულება 2028 წლის ბოლომდე გააფორმა“, – წერია განცხადებაში.
„ბათუმელები“ 26 წლის ნახევარმცველთან კონტრაქტს 2028 წლის ბოლომდე გააფორმებენ.
„ბედნიერი ვარ „დინამოში“ გადმოსვლით, ეს ჩემთვის ახალი გამოწვევაა. პირველად ვითამაშებ ისრაელის საზღვრებს გარეთ და ვფიქრობ, წინ საინტერესო თავგადასავალი გველის“, – აღნიშნა ავაკა ეშეთემ.
ეშეთე ბათუმში გადმოსვლამდე იერუსალიმის „ჰაპოელის“ რიგებში თამაშობდა. ის კლუბის აღზრდილია და პირველ გუნდში 2016 წლიდან ასპარეზობდა. საერთო ჯამში, ავაკამ „ჰაპოელის“ მაისურით (ყველა ტურნირზე) 229 მატჩი ჩაატარა, გაიტანა 10 გოლი და შეასრულა 6 საგოლე გადაცემა.
ავტორი: დიმიტრი გორგილაძე
