აჭარის მთავრობის ინფორმაციით, 2025 წლის რესპუბლიკური ბიუჯეტი 850 100 000 ლარს შეადგენს. მთავრობის დღევანდელ სხდომაზე თორნიკე რიჟვაძემ გაზრდილი ბიუჯეტის ფარგლებში დაგეგმილი და მიმდინარე პროექტები განიხილა.
არჩევნებამდე რამდენიმე დღით ადრე თორნიკე რიჟვაძემ სხვადასხვა ინფრასტრუქტურული პროექტის, საჯარო სამსახურში ხელფასების მატების და სოციალური შეღავათების დაწესების შესახებ ისაუბრა.
„ჩვენ მომავალი წლის ბიუჯეტს ვგეგმავთ 11%-იანი ზრდით. უკვე გამოცხადდა შესაბამისი სატენდერო პროცედურები სხვადასხვა პროექტების განსახორციელებლად. უახლოეს პერიოდში გამოცხადდება „ოცნების ქალაქის“ მეორე ეტაპი და ამ მიმართულებით გათვალისწინებულია 30 მლნ ლარი. აღნიშნული პროექტის ფარგლებში აშენდება 1100 ახალი ბინა და ყველა იქ მაცხოვრებელი, იქნება დაკმაყოფილებული უსაფრთხო, თანამედროვე საცხოვრისით. იზრდება როგორც კაპიტალური, ასევე სპეციალური ტრანსფერები ყველა მუნიციპალიტეტში, რისთვისაც მსურს მადლობა გადავუხადო საქართველოს მთავრობას, ბატონ პრემიერ მინისტრს, რადგან გაითვალისწინეს ჩვენი თხოვნა და მაღალმთიანი აჭარის რიგ მუნიციპალიტეტებს გაეზრდებათ დღგ-ს შესაბამისი განაკვეთი, რაც მათ მისცემს საშუალებას საბიუჯეტო ღონისძიებები კიდევ უფრო ეფექტიანად დაგეგმონ. ბიუჯეტის ზრდის ფარგლებში, აჭარაში, როგორც ცენტრალურ აპარატში, ასევე შესაბამის საქვეუწყებო დაწესებულებებში საჯარო მოხელეებს გაეზრდებათ ხელფასი და დარწმუნებული ვარ ეს იქნება სტიმული საქმის ეფექტიანად და კეთილსინდისიერად კეთების“, – განაცხადა თორნიკე რიჟვაძემ.
აჭარის მთავრობის ცნობით, რესპუბლიკური ბიუჯეტი 85 400 000 ლარით გაიზარდა და 850 100 000 ლარს შეადგენს.
