ბუნებრივი აირის დაზიანებული მილი - ქობულეთი, სოფელი ჩეხედანა
აჭარის სრული გაზიფიცირება 2020 წლისთვის უნდა დასრულდეს – ეს განცხადება აჭარის მთავრობის თავმჯდომარემ ეკუთვნის. თორნიკე რიჟვაძის პირობა დღემდე შეუსრულებელია. მაღალმთიანეთისა და აჭარის სხვა მუნიციპალიტეტების მცხოვრებლები ბუნებრივ აირს დღემდე უშედეგოდ ელოდებიან.
“ჩვენი გეგმის შესაბამისად, 2020 წელს სრულად უნდა დავასრულოთ აჭარის გაზიფიცირება. ეს ნიშნავს ძლიერ ოჯახებს და იმას, რომ კიდევ უფრო მეტად მოვუფრთხილდებით ტყეს და ეკონომიკაც და ტურიზმიც კიდევ უფრო მეტად განვითარდება რეგიონში“, – აცხადებდა 2019 წელს თორნიკე რიჟვაძე მედიასთან საუბრისას.
აჭარის მუნიციპალიტეტების სოფლები ბუნებრივი აირის მილებით დაიქსელა, თუმცა პროექტების ექსპლუატაციაში მიღება გაურკვეველი მიზეზებით დღემდე არ ხდება. რატომ არ აქვს იმ სოფლებს ბუნებრი აირი, სადაც მილების მონტაჟი დასრულდა – კითხვა პასუხგაუცემელია.
ოპოზიციისა და მოსახლეობის ინფორმაციით კი, სამუშაოები თავის დროზე ხარვეზებით შესრულდა. უფრო კონკრეტულად, მილების უდიდესი ნაწილი ექსპლუატაციამდე კოროზირებული და დაზიანებულია. “ნაციონალურ მოძრაობაში” ეჭვობენ, რომ საქმე გვაქვს კორუფციასთან, რის გამოც პარტია გამოძიებას ითხოვს.
აჭარის უმაღლესი საბჭოს საფინანსო-საბიუჯეტო და ეკონომიკურ საკითხთა კომიტეტის წევრის მტკიცებით, პროექტები ხარვეზებით არ შესრულებულა და ბუნებრივი აირის მილები ვარგისია. ტიტე აროშიძე გვარწმუნებს, რომ “დაპირების შესრულება” მოხდა.
“ძირითადი ამოცანა, რაც იყო მაგისტრალის გაყვანა მოხდა, რომელიც ასევე, სოფლების დაქსელვას გულისხმობდა. რაც შეეხება მილებს, კოროზირებული არაა, სადაც არის ხარვეზები კომპანიას ახლით ჩანაცვლების ვალდებულება აქვს. მაღალმთიანეთში, რელიეფის გამო, შესაძლოა ვერ მოხდა მილების სრულყოფილად გაყვანა, თუმცა პერიოდულად დასრულდება სამუშაოები. ძირითად მიმართულებებზე გაზი უკვე შეყვანილია,” – უთხრა “აჭარა თაიმსს” ტიტე აროშიძემ.
ცნობისთვის: დაბა ხულოსა და მუნიციპალიტეტის სოფლებში დღემდე არაა ბუნებრივი აირი, არადა თორნიკე რიჟვაძემ 2020 წლის ოქტომბერში ფეისბუქზე დაწერა: “დაბა ხულოში გაზი ავანთეთ”.
აჭარის უმაღლესი საბჭოს უმრავლესობის წევრს ქობულეთის მუნიციპალიტეტზეც ვკითხეთ, სადაც დაბალი ზონის სოფლებიც დღემდე ბუნებრივი აირის გარეშეა. ტიტე აროშიძე ამ შემთხვევაშიც გვიმტკიცებს რომ “დაპირება შესრულებულია”
“გაზი უამრავ სოფელში უკვე შეყვანილია. მაგისტრალის მშენებლობა დასრულებულია,” – იმეორებს ტიტე აროშიძე და ამით თემაზე საუბარს ასრულებს.
ინფორმაციისთვის: აჭარის მთავრობის თავმჯდომარემ მაგისტრალზე არა, ბუნებრივი აირის შეყვანასა და სარგებლობაზე გააკეთა განაცხადი.
ბუნებრივი აირის გარეშეა შუახევის მუნიციპალიტეტიც, ქედაში კი რამდენიმე თვის წინ, დაბა და მიმდებარე ოთხამდე სოფელის გაზიფიცირება მოხდა.
აჭარის სოფლებში ბუნებრივი აირის ქსელის პროექტირებასა და მშენებლობაზე სხვადასხვა კომპანიაა პასუხისმგებელი.
