აჭარის ფინანსთა და ეკონომიკის მინისტრს ახალი მოადგილეები ჰყავს, საკადრო ცვლილების შესახებ გადაწყვეტილება უწყების თანამშრომლებს დახურულ კარს მიღმა თორნიკე რიჟვაძემ გააცნო. მთავრობის თავჯდომარემ ახალი კადრები მედიის გარეშე წარადგინა.
“მინისტრის მოადგილედ უჩა სურმანიძე დაინიშნა. პროფესიით ეკონომისტს საჯარო სამსახურში მუშაობის 10 წლიანი გამოცდილება აქვს. ასევე, მინისტრის მოადგილის თანამდებობა მამუკა თურმანიძემ დაიკავა. პროფესიით იურისტი 2022 წლიდან აჭარის საავტომობილო გზების დეპარტამენტის უფროსის პოზიციაზე მუშაობდა,” – წერს სამინისტრო მის მიერ გავრცელებულ პრესრელიზში.
ინფორმაციისთვის: დღესვე, ახალი ხელმძღვანელი წარუდგინეს აჭარის საავტომობილო გზების დეპარტამენტის თანამშრომლებსაც. “უფროსის თანამდებობაზე სახელმწიფო სამსახურში მუშაობის მრავალწლიანი გამოცდილების მქონე გიორგი ცინარიძე დაინიშნა,” – ამბობენ აჭარის მთავრობაში.
აქვე დაგაინტერესებთ: თავდაპირველად აჭარის ფინანსთა და ეკონომიკის მინისტრის მოადგილის პოსტი სულხან ღლონტმა დატოვა, მოგვიანებით მას გიორგი სურმანიძეც მიჰყვა.
საგულისხმო დეტალი: გავრცელებული ცნობებით, ჩინოვნიკებმა თანამდებობები “რუსული კანონის” მიღების გამო დატოვეს. სურმანიძესა და ღლონტს წასვლის შეშახებ განმარტებები არ გაუკეთებიათ. დოკუმენტში კი ასახეს, რომ “გადაწყვეტილება საკუთარი ნებით მიიღეს”.
