ქალაქის ცენტრში, ბათუმში, გორგილაძის ქუჩაზე, ერთ-ერთი კორპუსის ეზოში, 57 წლის ნანა სოხაძე მეუღლესთან ერთად ახალ წელს უკიდურესად მძიმე პირობებში ხვდება. წყვილი ცხოვრობს მცირე ზომის, სახელდახელოდ აშენებულ ქოხში, რომელიც პოლიეთილენის პარკებითაა შემოსაზღვრული და ელემენტარულ საცხოვრებელ პირობებსაც კი ვერ აკმაყოფილებს.
ქოხს იატაკი არ აქვს, ნანა და მისი მეუღლე პირდაპირ მიწაზე ცხოვრობენ. რამდენიმე კვადრატულ მეტრში მოთავსებულია ერთი საწოლი, პირადი ნივთები და პატარა ღუმელი. შეშის არარსებობის გამო, ცოლ-ქმარი იძულებულია ცეცხლის დასანთებად ნაგვის ურნებში ნაპოვნი ნივთები დაწვას, რაც განსაკუთრებით სახიფათოა ზამთრის პერიოდში, რთული მეტეოროლოგიური პირობების ფონზე.
ორივე მათგანს ჯანმრთელობის სერიოზული პრობლემები აწუხებს. თავის რჩენის მიზნით, ნანას მეუღლე ქუჩებში მოწყალებას ითხოვს. მისი თქმით, პენსიისა და სოციალური დახმარების ჯამური ოდენობა თვეში 200 ლარამდეა. ამ თანხის ნაწილს კი 500 ლარიანი სესხის დაფარვა ხმარდება, რომელიც ბანკიდან აიღეს.
ნანა სოხაძე გვიყვება, რომ ისინი სამეგრელოდან არიან. უკიდურესი გაჭირვების გამო, იძულებულნი გახდნენ საკუთარი საცხოვრებელი გაეყიდათ და ბათუმში გადმოსულიყვნენ. მისი თქმით, დიდი ქალაქი მათთვის უკანასკნელი იმედია – ფიქრობენ, რომ აქ საკვების ფულის შოვნა შედარებით მარტივია.
დღეს მათი ყოველდღიურობა გადარჩენისთვის ბრძოლას ჰგავს. მაღაზიებიდან ვადაგასულ პროდუქტს ეზიდებიან და მეტწილად სწორედ ასე იკვებებიან. მიუხედავად მძიმე ყოფისა, ნანა ამბობს, რომ დახმარების თხოვნა მათთვის რთულია და უხერხულობას გრძნობენ.
ვისაც დახმარების სურვილი ექნება, ნანა სოხაძის საკონტაქტო ნომერია: 574 20 79 28. (უშუქობის გამო, ხშირად ტელეფონის დამუხტვა უჭირთ, ამიტომ შესაძლოა, ხშირად ნომერი მიუწვდომელი იყოს).
🔻 ნანას ანგარიში აქვს „ლიბერთი ბანკში“, რომლის პირადი ნომერია: #01701136870
🔻მიმღები: ნ.ს
