ბათუმის თითქმის ყველა ქუჩაზე ინფრასტრუქტურა მოშლილია და მძღოლებს გადაადგილება რთულ პირობებში უწევთ, ამის შესახებ “ნაციონალური მოძრაობის” წევრები აცხადებენ და მაგალითად ადლიის დასახლება მოჰყავთ. მათი თქმით, ხელისუფლება პრობლემებზე სათანადოდ არ რეაგირებს, რის გამოც მოსახლეობას დისკომფორტულ გარემოში უწევთ ცხოვრება.
სხვადასხვა ქუჩაზე ორმოებია, ასევე, დაზიანებულია ცხაურები და საკომუნიკაციო ინფრასტრუქტურა.
“დღეს არარსებობს უბანი თუ ქუჩა, სადაც არ იგრძნობა ხელისუფლების მხრიდან უყურადღებობა. ასეთი მდგომარეობის მიუხედავად, ადგილობრივი ხელისუფლება და მერია თავისი კომფორტისთვის ყიდულობს ახალ ავტომობილებს და ზრდის შტატებს პარტიული აქტივის დასაქმებისთვის. ადლიის დასახლებაში ქუჩები გადათხრილი და მიტოვებულია, არარსებობს სანიაღვრე და საკანალიზაციო სისტემები,” – განაცხადა ბათუმის საკრებულოს დეპუტატმა, რეზო ხარაზმა ჟურნალისტებთან საუბრისას.
“ნახეთ რა მდგომარეობაშია საზოგადოებრივი ტრანსპორტის გაჩერებები. გაწვიმებისას დასახლებაში მდგომარეობა კატასტროფულია. ჩვენ დღეს ბათუმზე ორიენტირებული და ეფექტური ხელისუფლება გვჭირდება,” – აცხადებს უმაღლესი საბჭოს დეპუტატი პევან ანათაძე.
