შინაგან საქმეთა სამინისტროს ინფორმაციით, განსაკუთრებით დიდი ოდენობით ნარკოტიკული საშუალებებისა და ფსიქოტროპული ნივთიერებების საქართველოში უკანონოდ შემოტანის ფაქტი აღკვეთეს.
გამოძიების ფარგლებში, 1987 წელს დაბადებული გ.ხ. ქუთაისის საერთაშორისო აეროპორტში დააკავეს, ხოლო 1958 წელს დაბადებული ჯ.ქ. – საბაჟო გამშვებ პუნქტ „სარფის“ ტერიტორიაზე.
უწყების ცნობით, ბრალდებულების პირადი და ხელბარგის შემოწმებისას ამოღებულია განსაკუთრებით დიდი ოდენობით სხვადასხვა სახის ნარკოტიკული საშუალება და ფსიქოტროპული ნივთიერება. გარდა ამისა, ერთ-ერთი დაკავებულის მართვის ქვეშ არსებული ავტომობილის დეტალური დათვალიერებისას, სპეციალური სკანერის გამოყენებით, მალულად განთავსებული 247 აბი „სუბოქსინი“ აღმოაჩინეს.
გამოძიება მიმდინარეობს საქართველოს სისხლის სამართლის კოდექსის 260-ე, 261-ე, 262-ე და 263-ე მუხლებით. აღნიშნული დანაშაულები სასჯელის სახით 20 წლამდე ან უვადო თავისუფლების აღკვეთას ითვალისწინებს.
