“ნაციონალური მოძრაობის” წევრების თქმით, ბათუმის ცენტრალურ პარკში, ზოოკუთხის ტერიტორიაზე, ცათაბჯენის მშენებლობა იგეგმება. ლევან ანთაძემ და რეზო ხარაზმა დღეს გამართულ ბრიფინგზე განაცხადეს, რომ პარტია ბიზნესმენებთან მოლაპარაკებებს აწარმოებს.
“ბათუმის ცენტრალური პარკი სამწუხაროდ გახდა ბიძინა ივანიშვილისთვის სამიზნე. როგორც ჩვენთვის ხდება ცნობილი იგეგმება ზოოკუთხის ადგილას 52 სართულიანი საცხოვრებლის მშენებლობა იგეგმება. ეს გადაწყვეტილება “ოცნების” ჩაბეტონების პოლიტიკასთან თანხვედრაში მოდის, რომელსაც ისინი ეწევიან ბათუმის მიმართ. ჩვენ ბათუმელებს ვაძლევთ პირობას რომ ზოოკუთხე აშენდება ქალაქგარეთ და აქ რეკრიაციული ზოლი შენარჩუნდება. უფრო მეტიც, ამ ტერიტორიასა და ტბას ძველი ფუნქცია დაუბრუნდება და სანიჩბოსნო სპორტი განვითარდება,” – განაცხადა ლევან ანთაძემ.
მათი ინფორმაციით, პირველ ეტაპზე 52 სართულიანის მშენებლობის საკითხი განიხილება, ხოლო “ოცნებას” მოლაპარაკება რამდენიმე კომპანიასთან აქვს, რომლებიც მმართველი პარტიის შემწირველები არიან.
“ქართული ოცნება დადის ბიზნესმენებთან და ეუბნება, რომ ქალაქის ჩაბეტონებაზე გინთებთ მწვანე შუქს, ოღონდ ეს არჩევნები მოგვაგებინეთო. სრული მობილიზება ყველა იმ ადამიანის, ვინც ფიქრობს რომ ქვეყანა და ეს ადგილი მნიშვნელოვანია. პარკი არის გადასარჩენი,” – თქვა რეზო ხარაზმა ბრიფინგზე.
“აჭარა თაიმსი” კომენტარისთვის ბათუმის მერიასა და პარტია “ქართულ ოცნებას” დაუკავშირდა, პასუხის მიღების შემთხვევაში მასალა განახლდება.
ინფორმაციისთვის: 2023 წელს, საკრებულოს სხდომაზე ბათუმის მერმა, არჩილ ჩიქოვანმა განაცხადა, რომ ზოოკუთხის ადგილას არ იგეგმება კორპუსების აშენება და გამოთავისუფლებული ტერიტორია პარკის განვითარებას მოხმარდება.
