ბათუმში გაიმართა საჯარო ფორუმი თემაზე „განათლება, როგორც სოციალური უფლება და საზოგადოებრივი სიკეთე – სამართლიანი აწმყოსა და მომავლისთვის“.
შეხვედრაზე მონაწილეებმა საქართველოში განათლების სისტემაში არსებული გამოწვევები, ხარისხიანი განათლების ხელმისაწვდომობა, სოციალური უთანასწორობის გავლენა საგანმანათლებლო შესაძლებლობებზე და უმაღლესი განათლების მიმართულებით მიმდინარე ცვლილებები განიხილეს.
ორგანიზატორების განცხადებით, საქართველოში განათლების სფეროში არსებული პრობლემები სისტემურ მიდგომებს საჭიროებს. მათი შეფასებით, ახალი საგანმანათლებლო ინიციატივები შესაძლოა გააღრმავოს უთანასწორობა, შექმნას დამატებითი ბარიერები დაბალშემოსავლიანი ოჯახების წარმომადგენლებისთვის და გავლენა იქონიოს უმაღლესი საგანმანათლებლო დაწესებულებების ავტონომიაზე.
ფორუმის ფარგლებში გაიმართა დისკუსია, სადაც მონაწილეებმა საკუთარი შეფასებები და რეკომენდაციები წარმოადგინეს განათლების სისტემის განვითარების, თანაბარი ხელმისაწვდომობისა და განათლების ხარისხის გაუმჯობესების მიმართულებით.
ფორუმი „მოძრაობა სოციალური დემოკრატიისათვის“ ორგანიზებით ჩატარდა და მას განათლების სფეროს წარმომადგენლები, აკადემიური წრეების წევრები, სამოქალაქო საზოგადოების წარმომადგენლები და მოქალაქეები ესწრებოდნენ.
