ბათუმში, კიდევ ერთი, იუსტიციის სახლის რიგით 120-ე ფილიალი გაიხსნა. იუსტიციის სახლის ბათუმის №2 ფილიალი „ბათუმი ცენტრალი“-ს შენობაში განთავსდა.
სივრცე ქალაქის მოსახლეობასთან ერთად, მიმდებარე დასახლებების მცხოვრებლებსაც მოემსახურება.
“ახალ ფილიალში დასაქმებული 40-მდე ადგილობრივი თანამშრომელი მომხმარებელს 500-მდე სერვისს იუსტიციის სახლისთვის ჩვეული მაღალი სტანდარტით მიაწვდის. შესაბამისად, გაუმჯობესდება მომხმარებელთა ნაკადების მართვა-გადანაწილება, რაც ლოდინისა და მომსახურების დროის ოპტიმიზაციას შეუწყობს ხელს,” – აცხადებენ იუსტიციის სახლში.
ინფორმაციისთვის: წელს იუსტიციის სახლების გეოგრაფიული არეალი კიდევ უფრო გაფართოვდება. ფილიალების სამშენებლო სამუშაოები უკვე მიმდინარეობს: ჭალაში, ზოტში, ტოლებში, ცაიშში, შროშაში, თბილისში (გლდანი), თერჯოლაში, ახმეტაში, ხელვაჩაურსა და საგარეჯოში.
აჭარაში იუსტიციის 7 სახლი ფუნქციონირებს, მობილური იუსტიციის სახლი კი, 10 სოფელს ფარავს.
