ბათუმში, ყოფილი „უნივერსამის“ ტერიტორიაზე მრავალსართულიანის მშენებლობა მომიჯნავედ ავარიული შენობის მცხოვრებლებს საფრთხის ქვეშ აყენებს. მათივე თქმით, სამშენებლო სამუშაოებით გამოწვეულმა ვიბრაციამ შენობის კედლებზე ბზარები გააჩინა და არსებული დაზიანებები კი გააღრმავა. საუბარია საბჭოთა პერიოდის, ორსართულიან საცხოვრებელზე, რომელიც, როგორც მოსახლეობა აცხადებს, საგრძნობლად ირყევა და სიცოცხლისთვის სარისკო გარემოა.
„ჩვენი საცხოვრებლიდან ორი მეტრიც არაა დაშორებული და როგორც ხედავთ, აშენებენ ცათამბჯენს. სახლს დაემატა ახალი ბზარები, ჩვენი კორპუსი ერთ საუკუნეზე მეტი ხნისაა და ის ავარიული სახლების ჩამონათვალშია. ირყევა სახლი, ბევრჯერ დილითაც გაგვაღვიძა ხმაურმა. გარე ფასადზეც აქვს შენობას ბზარები. არაერთხელ ვთხოვეთ კომპანიას მოსულიყვნენ, ენახათ რა ხდება, მაგრამ პრობლემას სრულად უგულვებელყოფენ“, – ამბობს ნონა ასკურავა.
ნონა ასკურავას თქმით, შპს „უნივერსამმა“, რომელიც ობიექტის მშენებელია, იმავე საკადასტრო კოდში მოაქცია ავარიული ორსართულიანი კორპუსი, სადაც სხვებთან ერთად, მათი ოჯახიც ცხოვრობს. როგორც ვარაუდობენ, კომპანია სამომავლოდ შენობის დემონტაჟს გეგმავს, თუმცა ამის შესახებ მათთან ოფიციალური კომუნიკაცია არ ყოფილა.
განსაკუთრებული პრობლემის წინაშე დგას ასკურავების ოჯახი – ისინი აცხადებენ, რომ კომპანიას არ გაუფორმებია ხელშეკრულება. მიზეზი საკუთრების იურიდიულ სტატუსშია – ოჯახის საკუთრება საჯარო რეესტრში არ არის რეგისტრირებული, რაც სხვა საოჯახო სასამართლო დავასთან არის დაკავშირებული. ოჯახმა არაერთხელ მიმართა ბათუმის მერიას, მუნიციპალურ ინსპექციასა და უშუალოდ სამშენებლო კომპანიას. თუმცა, მათი თქმით, პრობლემა კვლავ უგულებელყოფილია და არცერთი უწყება რეაგირებს.
მშენებლობის ნებართვა შპს „უნივერსამს“ არჩილ ჩიქოვანმა მისცა. ადგილობრივები თვლიან, რომ უსაფრთხო გარემოში ცხოვრების უფლება უხეშად ირღვევა და სახელმწიფოსა და კომპანიის მხრიდან უყურადღებობა მათ სიცოცხლეს საფრთხეში აგდებს.
კომპანიაში ადასტურებენ, რომ ასკურავებთან ხელშეკრულების გაფორმებისგან თავს იკავებენ საკუთრების დაურეგისტრირებლობის გამო. რაც შეეხება ბზარების გაჩენასა და სახლის დაზიანებას, რაზეც ასკურავების ოჯახს პრეტენზია აქვთ – ამ თემაზე შპს „უნივერსამის“ მენეჯმენტში განმარტებას შეგვპირდნენ, თუმცა ისინი არ დაგვკავშირებიან. იმ შემთხვევაში თუ კომპანია პოზიციის დაფიქსირების სურვილს გამოთქვამს მასალა განახლდება.
