რამდენიმე დღეა აჭარაში აქტიურად ვრცელდება დაუდასტურებელი ინფორმაცია პოლიციის ყოფილი მაღალჩინოსნის, დავით რიჟვაძის დაკავების შესახებ.
საზოგადოების ნაწილი საუბრობს, რომ იგი თბილისში, სახელმწიფო უსაფრთხოების სამსახურის შენობაში გამოკითხვაზე იმყოფება.
დავით რიჟვაძის შესაძლო დაკავებაზე საუბრობენ ყოფილი მაღალჩინოსნების უახლოეს გარემოცვაშიც. გავრცელებული ცნობების მიხედვით, საქმე შესაძლოა კორუფციულ სქემებს უკავშირდებოდეს, თუმცა კონკრეტული დეტალები ჩვენთვის უცნობია.
საკითხის დაზუსტების მიზნით, „აჭარა თაიმსი“ დაუკავშირდა შინაგან საქმეთა სამინისტროსა და პროკურატურას. ორივე უწყება პოზიციას არ აფიქსირებს — შსს-ს მხრიდან უკვე მესამე დღეა კომენტარი ვერ მივიღეთ, ხოლო პროკურატურა კითხვებზე პასუხის გაცემის დაპირების მიუხედავად, შემდგომ ზარებს აღარ პასუხობს.
თორნიკე და დავით რიჟვაძეებთან დაკავშირება ვერ შევძელით. „აჭარა თაიმსი“ საჯაროდ აცხადებს, რომ მზად არის, ნებისმიერი მომენტიდან უზრუნველყოს მათი პოზიციის სრულფასოვანი გაშუქება, როგორც კი ისინი სურვილს გამოთქვამენ.
