ხელვაჩაურის სოფლებში ბუნებრივი აირის პროექტი უხარისხოდ განხორციელდა, რასაც ოპოზიცია დღეს კიდევ ერთხელ გამოეხმაურა. “ნაციონალური მოძრაობა” პროკურატურას მიმართავს და დახარჯული მილიონების მიზნობრიობის შესწავლას ითხოვს.
მიშა ბოლქვაძემ ბრიფინგი დღეს სოფელ მახოში გამართა, სადაც მილების მონტაჟის მიუხედავად სოფელს ბუნებრივი აირი არ მიეწოდება. სამუშაოების დასრულებიდან 2 წელზე მეტი გავიდა და ქსელის ექსპლუატაში ჩაშვება დღემდე არ მომხდარა. მილების უმრავლესობა უკვე კოროზირებულია.
“ხელისუფლება ჩაძირულია კორუფციაში. ჩვენ დღემდე არაერთი ფაქტი გავასაჯაროვეთ. ამჯერად კი სოფელ მახოსა და სიმონეთის გაზიფიცირების პროექტის მიმდინარეობის პროცესს გიჩვენებთ. 2 მილიონზე მეტი გადაუხადეს კომპანიას, რომელმაც სამუშაოები უხარისხოდ შეასრულა. პროკურატურას მივმართეთ აღნიშნული ფაქტის გამოძიების მიზნით, რასაც რეაგირება არ მოჰყვა. მიღება-ჩაბარების აქტის გაფორმების მიუხედავად, სოფლებს დღესაც არ მიეწოდება ბუნებრივი აირი,” – განაცხადა მიშა ბოლქვაძემ.
ინფორმაციისთვის: აჭარის მუნიციპალიტეტების სოფლების უმრავლესობაში ბუნებრივი აირის ქსელის მონტაჟი უხარისხოდ განხორციელდა, რის გამოც მილების დიდი ნაწილი უკვე დაზიანებულია. ხელისუფლება ამ ფაქტზე დღემდე განმარტებებს არ აკეთებს.
