ბათუმის საქალაქო სასამართლომ ხელოვნების უნივერსიტეტის დეკანი, მამუკა ჯორბენაძე და სამი სტუდენტი – გურამ მიქელაძე, დავით გვიანიძე და გიორგი დავითაძე 5 000 ₾არიანი გირაოს სანაცვლოდ გაათავისუფლა.
მოპასუხე მხარის შუამდგომლობას, აღმკვეთის სახით პატიმრობიდან გათავისუფლებას პროკურატურა მანამდე დაეთანხმა, ვიდრე მოსამართლე გადაწყვეტილებას მიიღებდა. მხარეებს შორის “შერიგების წერილი” შედგა, რომელსაც ხუთივე ბრალდებულმა, სასამართლო სხდომამდე ხელი მოაწერა – “აჭარა თაიმსის” ეს ინფორმაცია მამუკა ჯორბენაძემ დაადასტურა.
ერთი სტუდენტი, ანრი კაკაბაძე კი, პატიმრობაში დარჩა. გადაწყვეტილება მოსამართლემ იმ მოტივით ახსნა, რომ იგი წარსულში ნასამართლევია, რაც ბრალდების მხარის არგუმენტიც იყო. შესაბამისად გამოდის, რომ მოსამართლე ამ ნაწილში კვლავ პროკურატურას დაეთანხმა.
“ემოციურად ძალიან დატვირთული ვარ ამ სიტუაციით, რადგან ჩემი სტუდენტი კვლავ პატიმრობაშია. მე სამართალმცოდნე არ ვარ, თუმცა მორალური თვალსაზრისით, ვთვლი რომ ანრი კაკაბაძეს დიდი მომავალი აქვს, მისგან საფრთხეს არ ველოდები და ეს ყველაფერი ძალიან მძიმეა“ – განაცხადა მამუკა ჯორბენაძემ.
კონტექსტი: პროფესორი, მამუკა ჯორბენაძე გაფიცვის ორგანიზებაში მონაწილეობდა, რის გამოც სტუდენტები და ლექტორები ფიქრობენ, რომ მისი დაკავება პოლიტიკურად მოტივირებული იყო.
ინფორმაციისთვის: ინციდენტი სასწავლებლის შენობაში მოხდა. დაწესებულებაში ერთ-ერთი ლექტორის, თეა ცაგურიას ქმარი შეიჭრა და დეკანს ჯერ სიტყვიერად დაუპირისპირდა, რაც მოგვიანებით ფიზიკურ ძალადობაში გადაიზარდა. ირაკლი დევაძე ბათუმის მერიის მაღალჩინოსანია. ფაქტი უნივერსიტეტის სათვალთვალო კამერებმა ასახა, კადრები უკანონოდ თეა ცაგურიას ქმარმა მოიპოვა და სოციალურ ქსელში ატვირთა. კადრები კონტექსტისა და ხმის გარეშე პროპაგანდისტულმა მედიებმა გაავრცელეს.
გარემოება: შინაგან საქმეთა სამინისტროში შეტყობინება ინციდენტიდან მესამე დღეს შევიდა, რაც გამოძიების დაწყების საფუძველი გახდა. ინციდენტამდე როგორც სტუდენტები ყვებიან მამუკა ჯორბენაძესა და თეა ცაგურიას შორის სიტყვიერ შელაპარაკებას ჰქონდა ადგილი. კერძოდ, ცაგურია სტუდენტებს ცინიკურად მიმართავდა და გაფიცულებს ნაცებს, ასევე, მოძალადეებს ეძახდა. ამ გარემოებამ კი, ჯორბენაძის გაღიზიანება გამოიწვია.
