ფოტო: ქეთი გოგიტიძე
ევროპის საბჭოს ჟურნალისტთა უსაფრთხოების პლატფორმა საქართველოს ხელისუფლებას მოუწოდებს, დაუყოვნებლივ და სრულყოფილად გამოიძიოს ჟურნალისტ სულხან მესხიძეზე განხორციელებული ფიზიკური და სიტყვიერი თავდასხმის ფაქტი.
პლატფორმის განცხადებით, მედიის წარმომადგენელთა მიმართ მსგავსი ძალადობრივი ქმედებები მიუღებელია დემოკრატიულ საზოგადოებაში და საჭიროა შესაბამისი პირების პასუხისმგებლობის დაყენება.
ინფორმაციისთვის: ჟურნალისტთა უსაფრთხოების პლატფორმა ევროპის საბჭოს ინიციატივით შეიქმნა და მასში ევროპის წამყვანი პრესის თავისუფლების დამცველი ორგანიზაციები მონაწილეობენ. პლატფორმა მიზნად ისახავს ჟურნალისტებისა და მედიის პროფესიონალების წინააღმდეგ მიმართული საფრთხეების — მათ შორის, შევიწროების, ფიზიკური თავდასხმების, სამართლებრივი თუ პოლიტიკური ზეწოლის — მონიტორინგსა და მყისიერ რეაგირებას. ის აგროვებს და ამოწმებს შეტყობინებებს მედიის თავისუფლების სერიოზულ დარღვევებზე, უწყობს ხელს ანგარიშვალდებულების გაზრდას და წევრ სახელმწიფოებს ადამიანის უფლებათა ევროპული კონვენციით გათვალისწინებული ვალდებულებების შესრულებას ახსენებს.
ცნობისთვის: შემთხვევა, ხელვაჩაურის საკრებულოს სხდომის მიმდინარეობისას მოხდა. სულხან მესხიძე შეეცადა სხდომის გაშუქებას, თუმცა მას ამის შესაძლებლობა არ მიეცა. საჯარო მოხელეების მხრიდან თავდაპირველად სიტყვიერი შეურაცხყოფა და დაპირისპირება დაიწყო, რასაც მალევე ფიზიკური ძალადობა მოჰყვა. ჟურნალისტი სხდომათა დარბაზიდან მერიის თანამშრომლებმა იძულებით გამოათრიეს – ფიზიკური ძალის გამოყენებით, ხელების გადაგრეხვის პრინციპით.
გარემოება: „აჭარა თაიმსის“ დამფუძნებელსა და დირექტორ სულხან მესხიძეზე განხორციელებული ფიზიკური და სიტყვიერი თავდასხმის ფაქტი მედიის თავისუფლების რუკაზეც აისახა. მედიის თავისუფლების რუკა ასახავს პრესისა და მედიის თავისუფლების დარღვევებს მთელს ევროპაში და წარმოადგენს მნიშვნელოვან მექანიზმს ჟურნალისტებზე განხორციელებული თავდასხმების დოკუმენტირებას საერთაშორისო დონეზე.
აღნიშნულ რუკას მართავს პრესისა და მედიის თავისუფლების ევროპული ცენტრი. მექანიზმი მოქმედებს ევროკავშირის წევრ სახელმწიფოებსა და კანდიდატ ქვეყნებში, რაც მიზნად ისახავს მედიის თავისუფლებაზე თავდასხმების მონიტორინგსა და მათზე რეაგირებას.
დეტალები: საქართველოს შინაგან საქმეთა სამინისტროსა და სპეციალურ საგამოძიებო სამსახურს თავდასხმის ფაქტზე ამ დრომდე გამოძიება არ დაუწყია. სახალხო დამცველმა კი თავისი მანდატის ფარგლებში ინციდენტის შესწავლა დაიწყო.
