ექიმებს ახალშობილის გარდაცვალებაში ადანაშაულებენ. ოჯახმა და ახლობლებმა დღეს, ბათუმში, მედიისთვის ბრიფინგი გამართეს და სამედიცინო დაწესებულების შესაძლო გადაცდომის შესახებ ისაუბრეს. მათ “ბათუმის სამედიცინო ცენტრის” გინეკოლოგიური განყოფილების ექიმები არასწორ მკურნალობაში ღიად დაადანაშაულეს და რეაგირება ითხოვეს.
ოჯახის ინფორმაციით, ფეხმძიმობის პერიოდი გართულებებისა და ჩივილიების გარეშე მიმდინარეობდა, თუმცა მათი შეფასებით, ექიმებმა პაციენტს არასწორი პრეპარატი დაუნიშნეს, რაც ნაადრევი მშობიარობის მიზეზი გახდა.
“ახალშობილი მეორე დღესვე დაიღუპა. ჩვენ ექიმების ბრალეულობას ვხედავთ ამ პროცესში. მივმართავთ სამედიცინო რეგულირების სააგენტოს და საქმის გამოძიებას მოვითხოვთ,” – ამბობენ დარდაცვლილი ახალშობილის ოჯახის წევრები.
ბრალდებებს კლინიკა BMC-ში წერილობით უპასუხეს, რომელსაც უცვლელად გთავაზობთ:
“ბუნებრივია, აღნიშნული შემთხვევის შესახებ, ბრიფინგამდეც ცნობილი იყო ბათუმის სამედიცინო ცენტრისთვის. მიუხედავად იმისა რომ, ახალშობილი გარდაიცვალა სხვა სამედიცინო დაწესებულებაში, მოქმედი რეგულაციით, ახალშობილის გარდაცვალება სავალდებულოდ ითვალისწინებს შემთხვევის შესწავლას ჯანდაცვის სამინისტროს შესაბამისი უფლებამოსილი კომისიის მიერ. ბათუმის სამედიცინო ცენტრი, აქტიურად ითანამშრომლებს კომისიასთან და იმოქმედებს დასკვნისა და მოქმედი კანონმდებლობის მიხედვით. აღნიშნულ საკითხთან დაკავშირებით, ამ ეტაპზე, დამატებითი კომენტარი არ გაკეთდება,” – წერია კლინიკის მიერ მოწოდებულ წერილობით ინფორმაციაში.
