საქართველოს სტატისტიკის ეროვნული სამსახურის მონაცემებით, 2025 წელს საქართველოში 232 საავადმყოფო ფუნქციონირებდა. საავადმყოფოების საწოლთა ფონდი, 2024 წელთან შედარებით, 1.8 პროცენტით გაიზარდა და 15.2 ათასი შეადგინა.
სტატისტიკის მიხედვით, ქვეყანაში 2 318 ამბულატორიულ-პოლიკლინიკური დაწესებულება მოქმედებდა. ამ დაწესებულებებში ექიმთან მიმართვის 16.8 მილიონი შემთხვევა დაფიქსირდა, რაც წინა წელთან შედარებით 6 პროცენტით მეტია.
2025 წელს სამედიცინო დაწესებულებებში დასაქმებული იყო 22.5 ათასი ექიმი და 21.3 ათასი საექთნო პერსონალის წარმომადგენელი.
საქსტატის ინფორმაციით, პირველად დადგენილი დიაგნოზების მიხედვით, რეგისტრირებული დაავადებების რაოდენობა ყველაზე მეტად გაიზარდა შემდეგ ჯგუფებში:
- თანდაყოლილი მანკები, დეფორმაციები და ქრომოსომული დარღვევები – 14.2%-ით;
- სიმსივნეები – 12.7%-ით;
- ფსიქიკური და ქცევითი აშლილობები – 10.6%-ით;
- ძვალ-კუნთოვანი სისტემისა და შემადგენელი ქსოვილების დაავადებები – 8.9%-ით;
- თვალისა და მისი დანამატების დაავადებები – 6.8%-ით;
მოსახლეობაში ყველაზე გავრცელებულ დაავადებებს შორის კვლავ ლიდერობს სასუნთქი სისტემის დაავადებები. ასევე მაღალი გავრცელებით გამოირჩევა თვალისა და მისი დანამატების, ძვალ-კუნთოვანი სისტემისა და შემადგენელი ქსოვილების, სისხლის მიმოქცევის სისტემისა და შარდ-სასქესო სისტემის დაავადებები.
ანგარიშის თანახმად, 2025 წელს საქართველოში შიდსის 562 ახალი შემთხვევა გამოვლინდა, რაც 53-ით ნაკლებია 2024 წლის მაჩვენებელთან შედარებით. შიდსით დაავადებულთა კუმულატიურმა რაოდენობამ 11 568 შეადგინა, ხოლო წლის განმავლობაში დაავადებას 150 ადამიანის სიცოცხლე ემსხვერპლა.
ამავე პერიოდში ტუბერკულოზის ახალი შემთხვევების რაოდენობა 7.3 პროცენტით შემცირდა, ხოლო ტუბერკულოზით დაავადებულთა საერთო რიცხოვნობა 12.9 პროცენტით შემცირდა და 1 142 შეადგინა.
საქსტატის მონაცემებით, 2025 წელს სასწრაფო სამედიცინო დახმარების სამსახურმა პირველადი დახმარება დაახლოებით 1.15 მილიონ ადამიანს გაუწია. შემთხვევების 99 პროცენტი დაკავშირებული იყო მოქალაქეების უცაბედ ავად გახდომასთან.
