ხვიჩა ასამბაძე აქტიურად მონაწილეობს აჭარის ტურიზმისა და კურორტების დეპარტამენტის კონკურსში „გამომყევი აჭარაში“. კონკურსის მიზანი შიდა ტურიზმის სტიმულირებაა. ვიდეოგრაფი აჭარის სხვადასხვა მუნიციპალიტეტიდან ძირითადად გასტრონომიული შინაარსის ვიდეოებს ავრცელებს.
კონკურსში მონაწილეობის პარალელურად, ხვიჩა ასამბაძეს, გამარტივებული შესყიდვის წესით, მიღებული აქვს რამდენიმე კონტრაქტი სახელმწიფო უწყებებისგან. კერძოდ: 2025 წლის 19 დეკემბერს მან ხელშეკრულება გააფორმა ხელვაჩაურის მუნიციპალიტეტის მერიასთან. შესყიდვის საგანს წარმოადგენდა ვიდეორგოლის მომზადება 1 700 ლარად.
სახელმწიფო შესყიდვების სააგენტოს გვერდზე მოძიებული ინფორმაციით ირკვევა, რომ პირველად ხელშეკრულება ასამბაძესა და ბათუმის სასპორტო სკოლის დირექტორ მუხრან ვახტანგაძეს შორის გაფორმდა. სახელშეკრულებო ღირებულება 1 500 ლარი იყო და შემსყიდველისთვის ფოტოგრაფიული მოწყობილობის მიწოდებას ითვალისწინებდა.
ერთი წლის შემდეგ ასამბაძეს ვიდეოგადაღებასა და მონტაჟში 840 ლარი გადაუხადა ოზურგეთის მუნიციპალიტეტის კულტურის, სპორტისა და ტურიზმის განვითარების ცენტრმა, ხოლო 2016 წელს 100-ლარიანი ხელშეკრულება გაფორმებულია მელიტონ კუხიანიძის სახელობის სიმღერისა და ცეკვის სახელმწიფო აკადემიურ ანსამბლთან. ხელშეკრულების საგანია ანსამბლის კონცერტის დისკზე ჩაწერა.
ხვიჩა ასამბაძე, რომელიც საზოგადოებაში ბოლო წლებია მეტწილად ინფლუენსერად პოზიციონირდება, სოციალურ ქსელებში აქტიურად ავრცელებს ვიდეოებს, რომლებშიც „ქართული ოცნების“ მიმართ მხარდაჭერას გამოხატავს. ამასთან, მის საჯარო ვიეოებში ხშირად გვხვდება ოპოზიციისა და სამოქალაქო აქტივისტების მიმართ კრიტიკული შეფასებები, მათ შორის მათი ქვეყნის ინტერესების წინააღმდეგ მოქმედ ძალებად მოხსენიება.
აჭარის ტურიზმის დეპარტამენტი რეგიონის პოპულარიზაციისთვის ინფლუენსერ გიორგი ჯობავას 56 000 ლარს უხდის
